雪菜豆乾炒鮮淮山

    新鮮淮山我都買過幾次，但係次次都係要嚟煲湯。最近睇電視飲食節目，話用新鮮淮山嚟炒餸係好爽口，咁我都要試吓先！

材料：
雪菜
新鮮淮山
五香豆腐乾
紅辣椒
蒜蓉

調味料：
鹽
糖
紹酒
雞粉

- 雪菜用清水浸 10 分鐘，洗乾淨，瀝乾水後切碎。

- 鮮淮山去皮，洗淨後切件；豆腐乾沖洗後切片；紅辣椒洗淨後切粒。

- 燒熱油，放豆腐乾落鑊略炒，盛起。

- 爆香蒜蓉同紅椒，之後落雪菜兜炒。

- 淮山落鑊，灒酒後不斷兜炒，之後將豆腐乾回鑊。

- 加入調味料及少量水，兜炒至乾身後即可上碟。

果然真係好爽口、好清甜，估唔到咁好食喎！

老竇就話都幾爽甜，好特別，不過就略嫌黐口少少喎！

Notes：

- 如果想淮山保持白色的話，切件後可放入清水中，防止變色。

- 雪菜預先用清水浸過可減低鹹味。

- 由於鮮淮山黏性比較高，所以落鑊後要不斷兜炒，以防黐底。