黑森林雪芳 Black Forest Chiffon

    Ryan 今年又有玩校際音樂節，本來諗住佢都應該 三甲 不入，因為今年佢好忙兼好懶，都無乜練琴，仲係咁多次比賽之中最唔認真、最唔投入嘅一次 o添！點知，居然俾佢攞到個第二名返嚟，佢梗係好開心啦，一離開會場就即刻問媽咪拎個電話，話要即刻同我報喜！

 

    之後，佢仲喺 Facebook 度寫咗段攪喊人嘅文字o添：

 

    關sir: 今日終於所有測驗和默書完畢了, 可以正正式式的跟你道謝. 幸好有你這個鋼琴老師, 如果不是你時常三翻四次地提點我整首歌演奏的技巧, 那裡要大聲, 那裡要細聲, 整首歌要好像操兵的拍子, 彈的時候好像操兵一樣, 結尾要起手要靚一點, 我真的有照著做, 評判宣佈結果前, 亦有講你所教我的彈法, 又一次証明, 我沒有跟錯老師, 今次我能夠拿到亞軍, 我知道沒有你我一定拿不到, 所以我真的非常感恩, 有幸做你的學生.所以這個亞軍也屬於你的.

 

    好啦，就整個佢鍾意食嘅朱古力蛋糕同佢慶祝啦！

可可雪芳蛋糕

 

材料：

低筋麵粉   45 克
可可粉     30 克
泡打粉    1 /2 茶匙
蛋白  5 個
他他粉     1 克
蛋黃   3 個
糖     80 克
橄欖油     30 毫升
水     60 毫升

 

- 麵粉、可可粉同泡打粉混合，過篩 3 次；他他粉加入蛋白內混合好。

- 用電動打蛋器將蛋白打至起泡，分 3 次加入 60 克糖，打至 8 成企身。

- 將打好嘅蛋白霜放入雪櫃內保存。

- 蛋黃打散，加入剩餘嘅 20 克糖拌勻，之後加橄欖油同水混合好。

- 將粉類加入蛋黃混合物內，用打蛋器均勻攪拌成麵糊。

- 將 1 / 3 份蛋白霜加入麵糊內拌勻，然後將剩餘嘅蛋白霜加入，用膠刮輕手拌勻。

- 將麵糊倒入模內，放入已預熱至 180 °C 嘅焗爐內焗約 30 分鐘。

- 出爐後立即將蛋糕模倒扣，攤凍後即可脫模。

 

 

裝飾

 

材料：

甜忌廉     140 克
櫻桃酒     1 茶匙
酒漬櫻桃   適量
朱古力碎   適量

 

- 甜忌廉用電動打蛋器打至 9 成企身，之後加入櫻桃酒拌勻，備用。

- 蛋糕上下切開兩份，將少量甜忌廉抹喺下層蛋糕面，放上適量酒漬櫻桃。

- 於櫻桃上面再抹上適量甜忌廉，然後將上層蛋糕放上。

- 將剩餘嘅忌廉抹上蛋糕表面，再灑上適量朱古力碎即成。

以上材料份量可做直徑 17 厘米蛋糕一個。

整黑森林有度好，就係即使抆 cream 抆得唔好，都有朱古力碎遮醜！

黑森林蛋糕簡直係蛋糕中嘅經典。

俾 Ryan 一個鼓勵，希望佢繼續努力學好鋼琴！

叫埋妹妹 Rylie 一齊影相先！妹妹大個咗好多，依家好識擺 pose 影相呀！

Notes：

- 由於可可粉會令到蛋白霜消泡，所以加入他他粉以增強蛋白霜嘅穩定性。

- 他他粉用量參考：每 5 隻蛋白就加 1 克他他粉。

- 可可粉亦同時會影響到麵糊膨脹，因此加入泡打粉幫助膨脹。

- 如果用淡忌廉代替甜忌廉的話，需額外加人 15 - 20 克糖打發。

 

 

P.S.  上年三個學生比賽，三個都攞個 “哽頸四” 返嚟，今年都有三個學生比賽，三個都不約而同拎到第二名，照咁推斷，下年應該都有三個學生比賽，三個都拎到冠軍，yeah！！！  ( 發夢 -ing )