薑汁柚子雞翼

    呢碟雞翼又係好似 macaron 咁，屬清貨之作！

 

    之前整嘢磨多咗好多薑汁用唔哂，咁我不嬲都係個慳家孤寒財主嘛，咪用樽裝起放入雪櫃囉，點知又試老人癡呆發作，完全無咗件事喎！！！！好彩啲薑汁唔易變啫。之後整完柚子豆沙餅，柚子茶所餘無幾，咁啱樽日本柚子醋同麥芽糖又用到撻底喇，咁就順勢將呢四樣嘢整埋一齊囉！

材料：
雞中翼

 

醃料：
糖
雞粉
薑汁
老抽
柚子醋

 

調味料：
柚子茶
麥芽糖

 

- 雞翼洗乾淨，用抹手紙索乾水份，放入已拌勻嘅醃料內醃兩個鐘以上。

- 燒熱油，用中慢火將雞翼煎至兩面金黃，盛起。

- 調味料加剩餘醃料汁倒入鑊內煮熱，將雞翼回鑊。

- 冚上鑊蓋將雞翼煮熟，汁料收乾後即可上碟。

好滿意今次煎嘅雞翼，隻隻都好金黃，上色均勻。

味道唔錯，不過下次要落番多少少柚子茶，再甜少少會仲好味。

Notes：
- 麥芽糖可預先座熱水軟化，會更容易勺出適當份量。

- 若果無醃料汁剩的話，可以直接加入適量清水，但要酌量加鹽、雞粉調味。

- 雞翼煮熟後但仍然有大量汁料剩的話，可以用大火收乾水份，或用粟粉水埋薄芡。