蔬菜蛋批 Vegetable Pie

噚日放假喺屋企無乜特別嘢要做，手痕痕又想開爐整嘢食，於是噚晚就揀咗整蔬菜批。

 

   呢個批相對地比較健康，因為我揀咗一個牛油用量比較少嘅食譜去整批底。至於餡料方面，全用蔬菜已經夠哂健康，而且我仲無落度奶或者 cream 去整，咁你話係咪食得好 “放心” 呢！

批底

 

材料：
牛油    50 克

低筋麵粉    200 克

鹽 8 克

冰水    80 毫升

雞蛋    1/2 隻

 

- 牛油切成細粒，之後加入麵粉同鹽，用手指將摔成麵包糠狀。

- 雞蛋拂打成蛋液，加入冰水拌勻。

- 將蛋液加入牛油粉粒內混合，搓成麵糰。

- 麵糰用保鮮紙包好，放入雪櫃雪 2 個鐘。

- 將麵糰拎出，用擀麵棍將麵糰擀薄至約 4 毫米厚。

- 將撻皮鋪入已搽油嘅撻模內，用手按壓至緊貼撻模後，用叉喺表面拮窿，備用。

 

 

批餡

 

材料：
西蘭花

紅燈籠椒

雞髀菇

乾蔥頭

雞蛋   3 隻
水    50 毫升

 

調味料：
鹽
黑椒粉

乾羅勒
 

- 西蘭花用洗米水浸洗乾淨，之後切細件。

- 燈籠椒及雞髀菇洗淨後切粗粒；乾蔥頭去衣後切圈。

- 將西蘭花同雞髀菇預先汆一汆水，瀝乾後連同燈籠椒及乾蔥圈放上撻皮上。

- 雞蛋同蛋黃拂打成蛋液，加水及調味料混合，之後倒入撻內。

- 放入已預熱至 220 °C 嘅焗爐內焗約 25 分鐘至蛋液凝固及表面金黃。

- 出爐後立即脫模，放上架上攤凍即可享用。

 

以上材料份量可做直徑 8 吋批 1 個。

第一次用呢個鹹批底食譜，唔知係因為無預先焗批底，定係個批底
本身質地係咁，我覺得底部唔夠鬆，有少少實。






食落有燈籠椒嘅爽甜，雞髀菇軟熟清香，蛋香就當然唔駛講啦，
反而西蘭花大大件都唔係好覺佢嘅存在！

Notes：

- 搓批底麵糰時切勿太過用力，否則會將麵糰壓得太實，焗出嚟嘅批底唔夠鬆脆。

- 西蘭花用洗米水浸洗可以將表面白色物質輕易洗掉。

- 雞髀菇汆水後除可煮至半熟外，亦有助入爐烘焗時減少出水情況。

- 焗好之後要趁熱將批脫模，否則批底與模之間容易產生水氣而受潮，難以脫模。

- 如果唔係用甩底模的話，搽完油之後可以鋪張牛油紙喺模底，咁就更加容易脫模。