Bagel & Muffin

        之前整過幾次麵包俾 Ernest，有幸得到佢嘅 “賞識”，對上一次佢話不如整朱古力蛋糕啦，小朋友開到口，無話唔應承嘅！用番仙姐個無敵食譜整，應該佢會食得滋味啩！

 

 

南乳芋頭冰豆腐

        又到初一食齋日，今晚整南乳燜芋頭，但呢個餸個亮點唔係芋頭，而係冰豆腐，因為佢索滿哂南乳汁，超好味！

 

超恐怖！！

        今朝 (其實都差唔多中午) 起身之後就即刻去開機洗衫，之後先至去梳洗兼 “辦大事”，做埋早課之後啲衫就啱啱洗完可以晾，正當我拎出個洗衣機隔網準備清理裡面啲毛塵時，發現隻曱甴屍骸喺個網入面，嚇到我丟都丟唔切，晾到最後一件衫時，原來機底仲有啲殘肢同翼！！！嗰一刻我真係有諗過成機衫重新再洗過，但係諗吓重新再洗又要嘥多四機水，算吧，當無事發生過！！其實都唔係第一次㗎喇，真係好唔明究竟佢係點樣自投羅 “網” 嘅！！

 

 

泡菜炒飯 Kimchi Bokkeumbap 김치볶음밥

        啱啱又醃好咗泡菜，今晚用咗嚟炒飯。呢個炒飯又係出自 Maangchi 姨手筆，易煮又好味，我自己就做咗少少變化，更加啱自己胃口。

 

 

醬油麴涼拌青瓜

         醬油麴除咗可以用嚟醃肉之外，仲可以當成涼拌醬料用，呢次我試咗做涼拌青瓜。

 

海鮮意粉伴南瓜汁

        整好 pasta 之後，更係要趁新鮮即刻煮啦！今次我用咗青口同魚柳，再加個南瓜蓉做醬汁，簡單易整又好味！

 

Gennaro's Pasta

        哈哈，同一日內連整兩個 Gennaro 食譜，咪就係因為睇完 focaccia 條片時，又俾我發現埋整 pasta 條片囉！又係意大利人教整意大利麵，我都一於又跟！！！！

 

 

彩色雜菜沙律

       巡 blog 時成日都睇到好多 blog 友話紅菜頭點好食法，味道點甜法，但我自己都唔係好食到甜味，可能係因為我都只係用嚟煲湯，未試過就咁食，而且煲完湯又唔覺得啖湯特別甜，所以早幾日就買咗個紅菜頭返嚟整沙律，一於試試原味係點。

 

        以前我都好少買紅菜頭，因為覺得好貴，起碼要 $10 斤，嗰陣時買斤菜芯或者學斗白菜都只係 $6 斤左右。但依家買斤菜閒閒哋都 $12 斤，但紅菜頭都依然係賣 $10 斤，相比起上嚟就變得唔覺好貴！今次我將紅菜頭切粗粒後放滾水內略煮至微微軟身，味道果然好清甜，同我之前食嘅湯渣完全係兩回事，而啲菜葉就有少少似莧菜味道。

 

 

Gennaro's Focaccia

       早前上 Youtube 搵食譜時，無意中見到 Gennaro Contaldo 跟 Donal Skehan 一齊整 focaccia，個成品非常之靚，好吸引，而且 signor Contaldo 又係 Jamie Oliver 個師傅，應該信得過，唔會衰得去邊！

 

        好，就試吓佢個食譜，開工！！

 

真係激死人呀！！

        前後都只係相差四日，個價又再創新低！？！？真係激到爆！！好彩今日睇咗新 catalogue，盞燈嚟緊都仲係賣 $199.9，如果今年仲賣平咗的話，我真係要撞牆同咬脷！！！！

 

 

梅菜蘿蔔燜麵筋

        上星期去教 Charmaine 時，佢媽咪問我食唔食梅菜，之後又問用唔用八角，跟住就越問越多，原來係佢個 friend 間酒樓做唔住要摺埋，所以俾咗好多用剩嘅食材佢，多都佢要不斷送俾朋友。除咗梅菜同八角之外，仲俾咗白芝麻、日式麵包糠同冬菇我㖭！跟住 Charmaine 仲抵死，話佢阿媽做乜唔問埋有無鮑參翅肚喎，真係衰！！ 

 

        燜呢個餸就用咗八角同梅菜，本來都諗住落埋冬菇，但後尾都係無落到，懶得就懶，做少一樣得一樣呀，哈哈！

 

 

Fruit Crumble

        上個禮拜買咗份雪梨供佛，用咗 3 個，剩低兩個自己食，點知難食到爆，可能未係時候啦，入口有渣之餘，仲酸到呢 …… 真係打哂冷震兼即刻變超人，另外嗰個即刻放棄唔食！！

 

       供完佛換落嚟嘅蘋果，一個要咗嚟整泡菜，另一個又唔知點用好，見到個超酸雪梨，靈感即刻到，就用嚟整 fruit crumble 啦！

 

 

IKEA 執平貨

        放喺琴頂盞座枱燈都用咗起碼有十幾廿年，雖然仲未壞，但係啲 "關節" 已經衰弱到無哂力，完全抬唔起頭做 "燈"，都係時間要退休喇！喺「IKEA」度睇中咗盞座枱燈好耐，諗住等吓會唔會有機會做特價，我不嬲買嘢都好忍得手，相對貴嘅嘢好多時都會俾我等到減價！當然，好多時都會係換季貨色或過期款式啦，不過無所謂啦，我都唔多介意，依家先開始用智能手機都係咁啦！

 

       早兩個禮拜教完琴之後，去搭車返屋企途中，途經鴨寮街，發現原來都有好幾檔賣 LED 燈膽，但價錢睇落都唔平得過「IKEA」幾多，不過其實我唔係太清楚要買乜型號、火數，對 LED 燈更加係完全無認識，見到覺得貴嘅燈膽型號喺「IKEA」買可能更加貴都唔定，趁今朝一早喺銅鑼灣教完琴，順便走過去「IKEA」度做吓功課先！

 

 

紅麴醬油麴

        大家仲記得我之前用紅麴代替米麴去整甘酒嗎？ 既然整得甘酒，咁就唔差在試埋整醬油麴啦，話唔定遲啲又玩埋發酵味噌㖭，哇哈哈哈 ~ ~ ~ ~

        記得同大家分享用甘酒整嘅麵包食唔到有明顯甜味，因為當時麵包係伴果醬一齊食，並無仔細品嘗味道，到第二日就咁食白麵包時，發覺越食越好味，除咗有明顯鹹味之外，仲有一種好特別嘅鮮味，好似煮餸時落咗味精、雞粉、香菇粉之類調味料嘅味道，突然間令我聯想到鹽麴同醬油麴，唔知係咪有相似嘅發酵作用而令到麵包有呢種鮮味呢？就係呢種味道令我更加有推動力用紅麴去試整醬油麴！

        blog 友鬼嫁話用嚟醃豬肉效果最明顯，咁我就試吓用嚟醃肉片，唔係自己親身體驗過都真係唔信咁神奇，肉片真係比平時鬆軟好多，好似出街食嗰啲 "鬆肉粉" 肉片咁腍，但係同時又醃到無哂肉味，味如嚼蠟，而用醬油麴醃過嘅豬肉就腍得嚟仍保持豬肉原來鮮味哦！

素炒粒粒

        整炒粒粒真係完全無難度，只係功夫多，洗洗切切都用好多時間！

        平時我會用豆腐乾嚟炒，少重功夫嘛，唔使預先將豆腐略煎炸至挺身，呢次用豆腐嚟整，之唔係懶之過囉，買咗嚿豆腐原本諗住用嚟整甜品，點知有啲材料又唔記得提前解凍，雖然依家天氣好熱，但雪到成嚿石頭咁，都需要一段時間先解到凍，等吓等吓，等極都未得，見個人又攰攰哋無乜心機，索性將啲嘢全部掟番哂上冰格，費鬼事整，嚿豆腐咪變咗用嚟炒粒粒囉！

 

人生的第一次貓山王

        貓山王聽就聽得多，呢次都係第一次食咋！小弟有幸品嚐得到，當然又係要多謝老友 Ernest 媽咪啦！

 

        見到店舖張卡片寫住「專業出口香港 (送貨上門服務)」，但原來起碼要訂 100kg 先送貨呢！咁攪法，要喺度攪個團購至得囉，哈哈！！ XD

 

自製韓式年糕 (純粘米粉) Tteok 떡

        呢個用純粘米粉整嘅年糕，其實好耐之前都已經整過一次，但因為當時仲未買麵包機，只係用部 food processor 嚟整，當然失敗收場啦！既然依家有部麵包機，梗係要再試整過啦！

 

班蘭咖吔椰檳 Pandan Kaya Coconut Loaf

        成日都話最怕就係食港式 “牙印包”，尤其係雞尾包，真係避之則吉！本身個餡味道已經唔多討好，包質仲軟身到不得了，一啖咬落去時，個牙印深到呢 …… 都唔知落咗幾多油去整！！但都有例外呀，有兩款港式包我都幾鍾意食，就係菠蘿包同椰檳，因為不單只食落香口，最重要係佢哋包質都係比較乾身，咬完都見唔到牙印！

 

       早前 Ernest 媽咪送咗樽喺大馬帶返嚟嘅班蘭咖吔俾我，其實我都好耐無食過咖吔呢樣嘢，因為好細個時媽咪都曾經買過嚟搽麵包食，嗰陣時我覺得好難食，唔知係因為細個唔識食呀，定係嗰隻所謂 “名牌” 整得唔好食喇，總之就係印象麻麻啦！但係呢次嘅班蘭咖吔令我改觀，無咗當年我食到嗰種怪味之外，仲多咗一份班蘭嘅清香㖭！今日就用佢嚟整番個椰檳俾Ernest 媽咪做回禮。

 

彩椒全麥 scone

        前幾日買咗啲韭菜花、芽菜同三色椒嚟清炒，見到啲三色椒顏色咁靚，突然諗番起好耐無整嘅香蔥甜椒 scone，於是就留番起少少韭菜花同三色椒嚟整。除咗用韭菜花代替蔥之外，今次仲溝咗部份全麥粉落去整，食得更加健康呀！