IKEA 執平貨

        放喺琴頂盞座枱燈都用咗起碼有十幾廿年，雖然仲未壞，但係啲 "關節" 已經衰弱到無哂力，完全抬唔起頭做 "燈"，都係時間要退休喇！喺「IKEA」度睇中咗盞座枱燈好耐，諗住等吓會唔會有機會做特價，我不嬲買嘢都好忍得手，相對貴嘅嘢好多時都會俾我等到減價！當然，好多時都會係換季貨色或過期款式啦，不過無所謂啦，我都唔多介意，依家先開始用智能手機都係咁啦！

 

       早兩個禮拜教完琴之後，去搭車返屋企途中，途經鴨寮街，發現原來都有好幾檔賣 LED 燈膽，但價錢睇落都唔平得過「IKEA」幾多，不過其實我唔係太清楚要買乜型號、火數，對 LED 燈更加係完全無認識，見到覺得貴嘅燈膽型號喺「IKEA」買可能更加貴都唔定，趁今朝一早喺銅鑼灣教完琴，順便走過去「IKEA」度做吓功課先！

 

 

        盞燈就等唔到佢減價喇，一直都係賣 $199，但發現原來啱呢隻枱燈用嘅燈膽就做緊特價，減咗 $10，仲平過去鴨寮街買，咁多款燈膽都唔減，偏偏淨係呢隻 400 流明嘅 E14 燈膽減價！本來都諗住唔買住，等埋下個禮拜出新 catalogue 時睇吓枱燈會唔會平啲先一次過買，問過職員，佢又話唔知做特價會做到幾時，好難講。算啦，一次買埋盞燈，反正新 catalogue 出之後都未必會平過依家，上次買個浴室角架仲貴多幾蚊㖭呀！
 
 
 

盞燈依家咁睇就好靚仔、"閃令令"，但係個價錢咁大眾化，

都預咗佢用得耐表面層電鍍會走色㗎喇！

 

 

 

 

 

 

呢幾個玻璃樽就仲抵！不嬲都係賣開 $35.9，屋企都已經

有兩套，用嚟裝調味料，依家做緊特價，$21.9 就有

交易，即刻拎 pack 走先！其實早前快閃價

仲抵，$15.9 㖭咋，可惜我 miss 咗！