紅麴醬油麴

        大家仲記得我之前用紅麴代替米麴去整甘酒嗎？ 既然整得甘酒，咁就唔差在試埋整醬油麴啦，話唔定遲啲又玩埋發酵味噌㖭，哇哈哈哈 ~ ~ ~ ~

        記得同大家分享用甘酒整嘅麵包食唔到有明顯甜味，因為當時麵包係伴果醬一齊食，並無仔細品嘗味道，到第二日就咁食白麵包時，發覺越食越好味，除咗有明顯鹹味之外，仲有一種好特別嘅鮮味，好似煮餸時落咗味精、雞粉、香菇粉之類調味料嘅味道，突然間令我聯想到鹽麴同醬油麴，唔知係咪有相似嘅發酵作用而令到麵包有呢種鮮味呢？就係呢種味道令我更加有推動力用紅麴去試整醬油麴！

        blog 友鬼嫁話用嚟醃豬肉效果最明顯，咁我就試吓用嚟醃肉片，唔係自己親身體驗過都真係唔信咁神奇，肉片真係比平時鬆軟好多，好似出街食嗰啲 "鬆肉粉" 肉片咁腍，但係同時又醃到無哂肉味，味如嚼蠟，而用醬油麴醃過嘅豬肉就腍得嚟仍保持豬肉原來鮮味哦！

材料：
紅麴       75 克
醬油      150 毫升

- 先將玻璃樽消毒，將米麴及 125 毫升醬油倒入樽內。攪拌均勻。

- 將樽蓋放上，毋需扭緊。

- 翌日加入餘下 25 毫升醬油，拌勻。

- 之後每天攪拌一次，發酵約 7 – 10 日。

 

- 發酵完成後放入雪櫃儲存。

第一日啲紅麴吸收咗大量醬油，令紅麴唔能夠

被醬油完全覆蓋，到第二日再添加醬油

時，先至啱啱好浸過紅麴表面。

 

 

 

 

 

 

初試味道時，覺得味道咪又係好似未發酵之前嘅醬油味道，但之後

再去試試醬油原味時，發覺真係好唔同，醬油只係 "死鹹" 味，

而醬油麴味道無咁鹹之餘，仲多一分鮮味，好似已經

調過味嘅醬料，跟之前用甘酒整包個味道相似。

 

 

 

 

 

 

 

除咗金針雲耳之外，仲加埋洋蔥同京蔥去炒肉片，用紅麴整嘅

醬油麴唯一唔好處咪又係攪到啲食材變哂紅色囉！

望落去仲以為食生豬肉㖭！！不過煮過之後

就無咗紅麴本身嗰種苦澀味。

 

Notes：

- 若果跟傳統做法用米麴的話，份量跟紅麴相同。

- 樽蓋只需放上玻璃樽上而毋需扭緊，可讓新鮮空氣進入樽內供麴菌發酵。

- 玻璃樽必須事先經過消毒，避免樽內存有其他雜菌、黴菌影響麴菌發酵，請參考
 《玻璃樽消毒方法》。