彩色雜菜沙律

       巡 blog 時成日都睇到好多 blog 友話紅菜頭點好食法，味道點甜法，但我自己都唔係好食到甜味，可能係因為我都只係用嚟煲湯，未試過就咁食，而且煲完湯又唔覺得啖湯特別甜，所以早幾日就買咗個紅菜頭返嚟整沙律，一於試試原味係點。

 

        以前我都好少買紅菜頭，因為覺得好貴，起碼要 $10 斤，嗰陣時買斤菜芯或者學斗白菜都只係 $6 斤左右。但依家買斤菜閒閒哋都 $12 斤，但紅菜頭都依然係賣 $10 斤，相比起上嚟就變得唔覺好貴！今次我將紅菜頭切粗粒後放滾水內略煮至微微軟身，味道果然好清甜，同我之前食嘅湯渣完全係兩回事，而啲菜葉就有少少似莧菜味道。

 

 

除咗紅菜頭整之外，沙律材料仲有翠玉瓜、南瓜、車厘茄、

洋蔥、紅蘿蔔、生菜同黑橄欖，用油醋汁撈好就食得。

根據整炒粒粒嘅經驗，即使每樣材料買少份量，最後整好

都會變成一大碟，所以今次整沙律每樣材料都

買個 Q 版 size，但都食咗三餐哦！

另一餐我就用千島醬做沙律汁，再配件彩椒 scone。