南乳芋頭冰豆腐

        又到初一食齋日，今晚整南乳燜芋頭，但呢個餸個亮點唔係芋頭，而係冰豆腐，因為佢索滿哂南乳汁，超好味！

 

材料：
豆腐
冬菇
芋頭
辣椒乾 

調味料：
南乳
五香粉
糖 

- 豆腐略沖洗後放冰格雪過夜至硬身，之後解凍，輕輕榨乾水份後切件。

- 冬菇洗淨，用清水浸發至軟身，切去菇蒂；辣椒乾切碎。

- 芋頭去皮、切件，加適量油撈勻後放到烤盤上，放入已預熱至 240 ℃ 嘅焗爐內焗約
   20 分鐘至表面金黃。

- 燒熱油，辣椒乾、南乳同五香粉落鑊爆香，加入芋頭兜炒。

- 加適量水煮滾，將冬菇放入，轉中慢火，加適量糖調味。

 

- 當芋頭燜至半腍後，將豆腐放入，燜至芋頭完全腍身，轉大火將汁收乾即可。

 

 

豆腐經過結冰之後，組織已完全被破壞，形成蜂巢狀，

榨乾水份後就好似海棉咁勁吸醬汁。

 

買到嚿芋頭好粉，切嗰陣時已經感覺到，如果唔焗過

或炸過先燜，肯定唔使無耐就變咗芋蓉！