2014年8月10日星期日

素炒粒粒

        整炒粒粒真係完全無難度,只係功夫多,洗洗切切都用好多時間!

        平時我會用豆腐乾嚟炒,少重功夫嘛,唔使預先將豆腐略煎炸至挺身,呢次用豆腐嚟整,之唔係懶之過囉,買咗嚿豆腐原本諗住用嚟整甜品,點知有啲材料又唔記得提前解凍,雖然依家天氣好熱,但雪到成嚿石頭咁,都需要一段時間先解到凍,等吓,等極都未得,見個人又攰攰哋無乜心機,索性將啲嘢全部掟番哂上冰格,費鬼事整,嚿豆腐咪變咗用嚟炒粒粒囉!
 

材料:
豆腐
冬菇
榨菜
四季豆
蒜茸

調味料:
紹酒
生抽
調味雞汁
麻油
 
- 豆腐沖洗後略壓出水份,然後切粒;冬菇浸發好,洗淨去蒂後切粒。
 
- 榨菜洗乾淨、切粒,用清水浸半個鐘後瀝乾水份;四季豆洗淨後切粒。
 
- 燒熱適量油,放豆腐入內半煎炸至微微金黃,盛起瀝乾油份。
 
- 將冬菇及榨菜落鑊爆香,加入四季豆及蒜茸兜炒,灒酒。
 
- 豆腐回鑊,加調味料及小量水,兜炒均勻後冚上鑊蓋,者至豆腍。
 
- 煮好後灑上麻油,兜勻後上碟。
 
 
炒粒粒最啱送飯,伴白粥一齊食都唔錯呀!
 
 
 
 
 
要爽口有爽口,要軟滑有軟滑,要惹味有惹味,
炒粒粒一定係口感豐富哦!
 
 
 
Notes
-
榨菜浸過水之後可減低過鹹味道。
 
- 要浸發冬菇,可參考《浸發冬菇方法》要點。
 
 
 

9 則留言:

  1. 係呀,切粒真係要有耐性,又要有多D材料,口感才豐富。

    回覆刪除
    回覆
    1. 係呀,好多時每樣材料買少少,因為種類多,炒埋之後就一大碟!

      刪除
  2. 您好叻呀,炒粒粒會有咁多種感覺嘅,我個仔話我炒親粒粒,就係要佢做口部運動,"趙"到牙軟呀。

    回覆刪除
    回覆
    1. 妳唔好咁講啦,咁啱用料有齊幾種唔同口感啫!

      妳通常用咩料炒呀,點解會趙到牙都軟呢!?妳落好多菜甫?

      刪除
    2. he~he~我用D爽口嘅食料多囉,如菜甫,花生,沙葛,豆干,木耳等等。

      刪除
  3. hi 好耐冇嚟喇
    我都好耐冇煮飯同整甜品喇..都有手痕但又懶冇整
    炒粒粒真係好多功夫 我炒過一次咋...不過用嚟送飯/粥真係一流

    回覆刪除
    回覆
    1. 真係好耐無見妳啦,近排點呀,係咪好忙、好攰呢?妳依家要湊 B,真係無乜時間可以煮飯整甜品,有時間都要嚟休息啦!

      整炒粒粒真係要好有心機同耐性,企喺度切粒都企到腳跛呀!

      刪除
  4. 呢個用來拌飯拌粥都超正!^^

    回覆刪除