班蘭咖吔椰檳 Pandan Kaya Coconut Loaf

        成日都話最怕就係食港式 “牙印包”，尤其係雞尾包，真係避之則吉！本身個餡味道已經唔多討好，包質仲軟身到不得了，一啖咬落去時，個牙印深到呢 …… 都唔知落咗幾多油去整！！但都有例外呀，有兩款港式包我都幾鍾意食，就係菠蘿包同椰檳，因為不單只食落香口，最重要係佢哋包質都係比較乾身，咬完都見唔到牙印！

 

       早前 Ernest 媽咪送咗樽喺大馬帶返嚟嘅班蘭咖吔俾我，其實我都好耐無食過咖吔呢樣嘢，因為好細個時媽咪都曾經買過嚟搽麵包食，嗰陣時我覺得好難食，唔知係因為細個唔識食呀，定係嗰隻所謂 “名牌” 整得唔好食喇，總之就係印象麻麻啦！但係呢次嘅班蘭咖吔令我改觀，無咗當年我食到嗰種怪味之外，仲多咗一份班蘭嘅清香㖭！今日就用佢嚟整番個椰檳俾Ernest 媽咪做回禮。

 

湯種

材料：
高筋麵粉      16 克
水                 80 毫升

- 將麵粉同水倒入細煲內，用中慢火邊加熱、邊攪拌直至達 65 ℃ 並變得稠身。

- 熄火後攤凍，待用。

主麵糰

材料：
高筋麵粉      234 克
全麥麵粉      50 克
鹽                 5 克
糖                 30 克
即用酵母      5 克
椰漿             40 克
水                約 35 毫升
班蘭咖吔     適量
椰絲             適量

- 所有材料連湯種混合攪拌，逐少加水搓成麵糰。

- 搓揉摔打成光滑麵糰後滾圓，放入已灑粉嘅兜內，用保鮮紙封好，發酵約 45 分鐘。

- 麵糰排氣後再次滾圓，靜置鬆弛 15 分鐘。

- 壓平麵糰，用擀麵棍擀薄成長橢圓形，然後均勻塗上咖吔並灑上椰絲。

- 由上而下小心捲起麵糰，捏緊收口，頭尾兩端亦需收口。

- 將麵糰放入多士模內，之後用利刀喺麵糰正中央割開，深度約為麵糰高度嘅一半。

- 最後發酵至多士模 9 分滿，放入已預熱至 180 ℃ 嘅焗爐內，焗約 25 分鐘。

- 出爐後立即脫模，於架上攤凍。

 

以上材料份量可做 450 克多士模麵包 1 條。

咖吔加埋椰絲，整緊時都已經聞到好香。

呢個係早前試整時嘅造型，你哋覺得邊個造型靚啲呢？