齋鹵味拼盤

        今日係端午節，我諗大部份朋友都會食吓粽，睇吓龍舟，夜晚同家人一齊做節，開開心心食餐飯。但係對於我嚟講，呢日正正就係 blog 友毛豆所謂嘅 "母難日"！所以，由三年前開始，每逢端午節我都會食齋，一來以作為對媽咪嘅思念及懷念，另一方面，亦係為媽咪做功德。
 
        星期一嗰日，我特別為媽咪整咗呢個齋鹵味拼盤，咁噚日去探媽咪時就帶埋去俾佢。而我今晚食嘅餸都係佢呀！
 
        咪睇見有成五款咁多，以為要攪好耐呀，前後夾埋都只係用咗三個鐘度咋，中間仲有時間俾我整多個番茄薯仔沙律㖭！ 
 

   

呢個齋鴨腎已經整過幾次喇，真係好好食，好惹味。

之前都 post 過一次喇，不過為咗方便大家，

再喺度寫多次個食譜啦！

 

 

齋鴨腎

材料：
麵筋 (水筋)

調味料：
老抽
素沙茶醬
鮮醬油
胡椒粉
冰糖
鹽

- 先將麵筋洗乾淨、切粒，之後放入加有白醋嘅滾水內汆水。

- 汆水後撈起，過冷河，然後用抹手紙將水份索乾。

- 將麵筋炸至金黃色，瀝乾油份備用。

- 鑊內加適量水及調味料，煮滾後將炸好嘅麵筋放落去煮。

- 冚上鑊蓋，用慢火煮到入味、收汁即可。

大家亦可參考之前嘅《齋鹵味 (齋鴨腎)》。
 
 
 
 
 
 

呢個五香南乳素鵝，係我第一次整㗎咋，所以做得唔係咁靚，

煎果陣時仲煎燶咗個底㖭呀！我能夠成功做到呢個

素鵝，都真係要多謝毛豆呀！因為佢好

仔細咁 step by step 教我整㗎！

 

 

 

五香南乳素鵝

材料：
乾腐皮

調味料：
生抽
老抽
南乳
鹽
冰糖
胡椒粉
五香粉

- 腐皮用濕布或整濕咗嘅抹手紙抹乾淨，之後對摺好，用綿繩綁緊。

- 燒熱油，將腐皮放落鑊，用最細火將兩面煎至金黃色，盛起。

- 鑊內加適量水及調味料，煮滾後放入煎好嘅腐皮。

- 冚上鑊蓋，用慢火煮到入味及收汁，盛起後切件享用。

食譜參考自毛豆嘅素鵝。 
 
 
 
 
 

素雞間中都會買嚟炒或煮，但係整成齋鹵味都係第一次。

今次就自行調味，創作出呢個鮑汁素雞。

鮑汁素雞

材料：
素雞

調味料：
素鮑汁
磨豉醬
糖

- 素雞略沖洗，用抹手紙索乾水份後切厚片。

- 燒熱油，將素雞兩面略煎香，盛起備用。

- 另煲滾少量水，加入調味料，將煎香素雞放入，用慢火煮至入味即可。

 

 

 

最後就係齋鹵味中嘅台柱：甜酸齋同咖喱齋喇！

呢兩隻齋鹵味應該係最受歡迎㗎喇，如果

無咗佢哋，成碟拼盤都失哂色！

甜酸齋

材料：
麵筋 (炸筋)

調味料：
白醋
茄汁
冰糖
鮮醬油

 

 - 煲滾水，加 1 湯匙白醋，將麵筋放入汆水，之後過冷河，沖走多餘油份，瀝乾水
   備用。

- 調味料加水，煮滾後放麵筋落去煮。

- 用慢火煮至收汁即成。

可同時參考《齋鹵味 (甜酸齋)》。

 

咖喱齋

材料：
麵筋 (炸筋)

調味料：
咖喱粉
鹽
冰糖
鮮醬油

- 先用白醋水將麵筋汆水處理。

- 之後燒熱油鑊，將咖喱粉爆香，之後加水煮開。

- 放入其餘調味料，煮到冰糖完全溶解後，就放入麵筋。

 

- 同樣將調味汁料煮至收乾即可盛起上碟。

你哋又有冇其他齋鹵味食譜可以同大家一齊分享呀？

 

 

Notes：
- 以上咁多款齋鹵味，煮嘅時候都要記得間中兜一兜或翻一翻轉，一來方便均勻上
  色同入味，二來就係防止麵筋同豆製品黐底。

- 我自己都唔記得咗買綿繩去綁腐皮，但係煎嘅時候係會不斷澎漲，所以我就用隻
  鑊鏟放喺腐皮上面，壓住佢就唔會有呢個問題出現。

- 煮咖喱齋時，除咖喱粉之外，亦可加埋黃薑粉，令煮好嘅麵筋顏色更加靚。

 

- 以上食譜中嘅鮮醬油均可用素雞粉代替。