金寶蘋果批 Apple Crumble Pie

        今日第一次整批，真係多功夫呀，又要整批底，又要整奶油餡；整完蘋果餡，又要整 crumble 面，真係整足幾粒鐘呀！！不過學 Louisa 話齋，幾辛苦都係值得嘅，因為個批真係好好食，不但批底、批面鬆脆，仲有我鍾意嘅肉桂味 o添。至於個杏仁奶油餡，真係勁好食呀，杏仁味香到呢 ……… 所以食完一件之後，明明已經好飽，但係都忍唔住又切多件嚟食呀！ 好滿足！

        整呢個批真係勁肥，差唔多成嚿牛油用哂！清洗用具果陣，仲攪到成個鋅盆都肥哂，睇見都幾恐怖！！不過再諗深一層，食咁多油落肚就仲更加恐怖呢，哈哈！好彩戴住手套嚟整咋，如果唔係，我對手肯定又肥又羶，整完之後寧願斬咗佢囉！

批底

材料：
低筋麵粉      60 克
高筋麵粉      120 克
牛油              90 克
糖                  45 克
雞蛋              1 隻
泡打粉          1 茶匙

- 凍牛油切粒；麵粉過篩 3 次；雞蛋拂打成蛋液。

- 將麵粉同糖混合好，之後加入牛油粒，用手指捽成麵包糠狀。

- 加入蛋液搓成麵糰，用保鮮紙包好，放入冰格雪 15 分鐘。

- 拎出麵糰，用擀麵棍將麵糰擀成約 1 厘米厚麵皮。

- 將麵皮鋪上批模上，切去多餘部份，用叉喺麵皮上刺窿，之後鋪張牛油紙喺上面，
  再放上烘焙豆喺面。

- 將批模放上烤盤上，放入已預熱至 180 °C 嘅焗爐內焗約 20 - 25 分鐘，取出攤凍。

杏仁奶油餡

材料：
牛油              100 克
杏仁粉          100 克
糖霜              60 克
雞蛋              60 克

- 先將牛油於室溫放軟。

- 用打蛋器將牛油打成忌廉狀，之後加入杏仁粉同糖霜，再用打蛋器打至鬆軟發白。

- 加入雞蛋，拌勻成杏仁奶油餡。


焦糖蘋果餡

材料：
蘋果              4 個
牛油              20 克
糖                  25 克
檸檬汁          2 茶匙
冧酒              2 茶匙

- 蘋果去皮、去芯，之後切粒。

- 燒熱鑊，將牛油及糖煮至焦糖色。

- 加入蘋果粒、檸檬汁同冧酒，拌勻，之後用慢火將蘋果煮至焦黃色即可。


鬆酥脆粒

材料：
牛油              45 克
糖                  20 克
低筋麵粉      60 克
肉桂粉          1/8 茶匙
梳打粉          1/4 茶匙

- 牛油與糖拌勻，篩入所有粉類。

- 將材料攪拌成麵糰，放入雪櫃內雪硬。


組合

- 將奶油餡舀喺批底上面。

- 鋪上蘋果粒喺奶油餡上，再將鬆酥脆粒刨碎喺蘋果粒上。

- 用 170 °C 焗約 25 分鐘即可。


以上材料份量可做直徑 8 吋圓批一個。

食譜係嚟自 Rachel Yau 嘅《為您做甜品》。 

 

原本想成個批拎出嚟影相㗎，但係唔知道點樣先可以好完整咁
拎出嚟，好驚會整爛，所以就成個連批模影算數。

 

 

 

 

因為我用果個係 7 吋模，所以除咗批底外，其餘材料都有少少剩，
於是我就用個布甸杯裝起哂，做個無批底嘅 apple crumble。

 

食一件批，歎杯咖啡，已經好滿足喇！

 

 

 

 

同媽咪一齊分享我嘅人生 "第一批"。

 

 

 

 

 

Notes：

- 原食譜係有落到雲呢嗱醬去整批底。

- 整蘋果餡時，Rachel 原本係用干邑拔蘭地，但係我屋企無，所以用冧酒代替。

- 個人認為，整批底時可以唔落泡打粉，因為焗完之後都發漲唔少呢。