2010年6月7日星期一

金寶蘋果批 Apple Crumble Pie

        今日第一次整批,真係多功夫呀,又要整批底,又要整奶油餡;整完蘋果餡,又要整 crumble 面,真係整足幾粒鐘呀!!不過學 Louisa 話齋,幾辛苦都係值得嘅,因為個批真係好好食,不但批底、批面鬆脆,仲有我鍾意嘅肉桂味 o添。至於個杏仁奶油餡,真係勁好食呀,杏仁味香到呢 ……… 所以食完一件之後,明明已經好飽,但係都忍唔住又切多件食呀! 好滿足!

        整呢個批真係勁肥,差唔多成嚿牛油用哂!清洗用具果陣,仲攪到成個鋅盆都肥哂,睇見都幾恐怖!!不過再諗深一層,食咁多油落肚就仲更加恐怖呢,哈哈!好彩戴住手套整咋,如果唔係,我對手肯定又肥又羶,整完之後寧願斬咗佢囉!




批底

材料:
低筋麵粉     
60 克
高筋麵粉      120 克
牛油              90 克
糖                  45 克
雞蛋              1 隻
泡打粉          1 茶匙

- 凍牛油切粒;麵粉過篩 3 次;雞蛋拂打成蛋液。

- 將麵粉同糖混合好,之後加入牛油粒,用手指捽成麵包糠狀。

- 加入蛋液搓成麵糰,用保鮮紙包好,放入冰格雪 15 分鐘。

- 拎出麵糰,用擀麵棍將麵糰擀成約 1 厘米厚麵皮

- 將麵皮鋪上批模上,切去多餘部份,用叉喺麵皮上刺窿,之後鋪張牛油紙上面,
  再放上烘焙豆喺面

- 將批模放上烤盤上,放入已預熱至 180 °C 嘅焗爐內焗約 20 - 25 分鐘,取出攤凍。


杏仁奶油餡

材料:
牛油              100 克
杏仁粉          100 克
糖霜              60 克
雞蛋              60 克


- 先將牛油於室溫放軟。

- 用打蛋器將牛油打成忌廉狀,之後加入杏仁粉同糖霜,再用打蛋器打至鬆軟發白。

- 加入雞蛋,拌勻成杏仁奶油餡


焦糖蘋果餡

材料:
蘋果              4 個
牛油              20 克
糖                  25 克
檸檬汁          2 茶匙
冧酒              2 茶匙

- 蘋果去皮、去芯,之後切粒。

- 燒熱鑊,將牛油及糖煮至焦糖色。

- 加入蘋果粒、檸檬汁同冧酒,拌勻,之後用慢火將蘋果煮至焦黃色即可。


鬆酥脆粒

材料:
牛油              45 克
糖                  20 克
低筋麵粉     
60 克
肉桂粉          1/8 茶匙
梳打粉          1/4 茶匙


- 牛油與糖拌勻,篩入所有粉類。

- 將材料攪拌成麵糰,放入雪櫃內雪硬。


組合

- 將奶油餡舀喺批底上面。

- 鋪上蘋果粒奶油餡上,再將鬆酥脆粒刨碎喺蘋果粒上。

- 用 170 °C 焗約 25 分鐘即可。


以上材料份量可做直徑 8 吋圓批一個。

食譜係嚟自 Rachel Yau 嘅《為您做甜品》。 


 
原本想成個批拎出嚟影相,但係唔知道點樣先可以好完整咁
拎出嚟,好驚會整爛,所以就成個連批模影算數。

 

 
 
 
因為我用果個係 7 吋模,所以除批底外,其餘材料都有少少剩,
於是我就用個布甸杯裝起哂,做個無批底 apple crumble。

 




食一件批,歎杯咖啡,已經好滿足喇!

 

 
 
 
同媽咪一齊分享我嘅人生 "第一批"。

 
 
 
 
 
Notes:
- 原食譜係有落到雲呢嗱醬去整批底。

- 整蘋果餡時,Rachel 原本係用干邑拔蘭地,但係我屋企無,所以用冧酒代替。

- 個人認為,整批底時可以唔落泡打粉,因為焗完之後都發漲唔少呢。


 



8 則留言:

  1. 最勁肥係面頭堆野.....我幾大都唔會落.........
    [版主回覆06/07/2010 18:31:00]        我反而覺得最恐怖係個批底囉,油到呢,真係掂 吓都有罪呀 ! 啲 crumble 都唔係用好多牛油咋嘛,可能我落得少啦,都唔係好搓得到成糰,好容易散。

    回覆刪除
  2. 係呀, 係呀, 見到批底嗰啲油真係好驚, 上次整完都係試佐一啖咋
    [版主回覆06/07/2010 23:29:00]        吓,試 咗一啖咋,跟住俾 咗 "大口仔" 食 嗱?         妳知嘛,之前我仲擔心唔知點脫模,怕個批會黐實個模甩唔到,點知原來唔駛搽油都自動離模,妳話其實油到呢!!我食完之後,睇番個批盤底,嘩, 啲油多到好似洗完碗未抹乾咁呀!

    回覆刪除
  3. 您個批做得好靚呀.   這麼多牛油, 一定好香, 好香了.    Yummy, yummy.   我都有 Rachel 本書, 不過暫時未夠班做.  等我努力多多學習, 一定會有機會試做的.
    [版主回覆06/08/2010 13:05:00]        首先多謝妳咁欣賞呀,我都係試 吓整 o架咋,點知出 嚟效果都 OK 喎!         人 哋整呢個批就實香噴噴,我整就一 啲都唔香,因為我其實幾抗拒乳製品 "朕" 味,頂唔順果 "朕" 羶味,所以我買 嚫乳製品都揀 啲最淡、最無味 嘅!         Rachel 本書其實都唔係真係好難整,只係繁複同多材料 啫,我呢個廚房新仔都得喇!妳可以試 吓整焦糖無花果 muffin 同果醬曲奇呀,應該唔太難,試做過一次之後妳就會有少少信心去挑戰難度 o架喇!         預祝成功!

    回覆刪除
  4. 多謝妳, Kestrel.  好介紹, 等我有時間試做吓 焦糖無花果 muffin 同果醬曲奇先.
    [版主回覆06/09/2010 23:07:00]        係啦,唔好浪費 咗本書嘛!如果整好之後記得叫我過去欣賞 吓喎!

    回覆刪除
  5. 整得咁辛苦梗係唔會益大口仔喇, 同屋企人分甘同肥lu
    係呀, 攞上手成手都油淋淋呀~  原來你唔鍾意乳製品朕味架...我好鍾意架
    [版主回覆06/09/2010 23:05:00]        " 同屋企人分甘同肥lu "        咁都好 啲,以為妳咁 "狠心" o添!         " 原來你唔鍾意乳製品朕味架 "         係我怪 啫!

    回覆刪除
  6. "整完之後寧願斬 咗佢囉!" 你都真係越嚟越誇喇!咁你食落肚嗰啲点計先?
    [版主回覆06/09/2010 23:02:00]        咁唔同喎!食 咗落肚之後都聞唔到果 "朕" 羶味啦,但係對手果 "朕" 味真係洗極都有 o架!!

    回覆刪除
  7. 你好呀, 我勁鐘意食Apple Crumble~ 我想問下你焗完呢個apple crumble後,個底皮會唔會好濕?因為我之前焗完出來個底好濕, 唔夠脆身, 而我都係用170c 25mins.請指教啊!! Tks
    [版主回覆12/22/2010 03:03:00]        咁又無呢個情況出現喎,!妳係咪無預先焗好個批底呀?

    回覆刪除
  8. 無呀, 我一次過下皮+ Filling + 上皮去焗架 你係分兩次架? 因為我有問過師夫, 佢教我唔駛分兩次喎, 因為兩次焗,下皮會焗黑, 但係我一齊過去焗又會好濕, 所以都係要請指d有經驗唧網友至得!! 咁你先焗好下皮, 再加Filling & 上皮然後再焗? 你個Filling冇加到麵粉, 會唔會好濕呢?鳴....我好失敗呀 請指教呀!!!
    [版主回覆12/25/2010 19:13:00]        唔好話指教,大家分享交流一 吓 啫!         先焗好撻底再放上餡料,咁就肯定保證撻皮焗好同焗脆,有 啲食譜仲會教搽上一層朱古力後先放上餡料,因為朱古力層有防潮作用。         至於餡料,我係跟足食譜整,無額外加麵粉 o架,但都唔會好濕喎,咪好似食布甸咁囉,不過比布甸實番少少。

    回覆刪除