泰式紅咖喱海鮮

        仲記得上個禮拜我煮嗰樽紅咖喱醬嗎？今晚我就用佢嚟煮海鮮，味道一流，辣味夠之餘又有淡淡酸味，而且香料味勁香濃，老豆都讚好食呢！我自己有一個習慣，就係煮濃味餸菜時就只會用急凍食材，唔會用新鮮肉食，因為即使用新鮮食材，其鮮味都會俾濃味汁料蓋過，簡直係浪費食材！所以呢次嘅海鮮料全部都係急凍貨色。

材料：
急凍青口
急凍魚柳
急凍蝦仁
茄子
粉絲
金不換
檸檬葉
清雞湯
椰醬

醃料：
鹽
胡椒粉
紹酒

調味料：
紅咖喱醬
紅椒粉 ( paprika)
魚露
糖

- 海鮮料解凍後洗乾淨，用抹手紙索乾水份，魚柳切件，同蝦仁一齊用醃料醃好。

- 茄子洗淨後切件；粉絲用清水浸軟，略沖洗；金不換及檸檬葉洗淨，備用。

- 燒熱油，放魚柳落鑊，將兩面略為煎熟，盛起備用。

- 蝦仁同青口放入鑊兜炒，灒酒後兜炒幾下，盛起。

- 再燒熱油，將檸檬葉同咖喱醬爆香，跟住落埋茄子一齊爆炒。

- 倒入清雞湯及適量水，冚上鑊蓋，將茄子略煮腍。

- 將海鮮料回鑊，加入粉絲及其餘調味料，兜勻後再煮多一陣。

 

- 倒入椰漿，落埋金不換，快手兜勻後即可上碟。

同街外泰式食肆相比，呢個紅咖喱嘅味道簡直係
有過之而無不及， 真係飯都會食多幾碗呀！





 

個咖喱唔知點解顏色唔夠紅，突然記起之前睇過有個食譜
會落紅椒粉， 於是我又試試咁做，果然顏色
即刻變得紅好多，靚哂！

Notes：
- 海鮮料非常易熟，所以唔駛煮太耐，否則會太過嚡及韌。

 

- 毋須擔心水份會過多，因為粉絲落鑊後就會勁吸收汁料。

 

- 加入椰醬及金不換後要快手兜勻，因為椰醬煮得太耐會煮出椰油；金不換煮過龍
  就會失去香味。