早前見到 blog 友毛豆喺關島度買到爆炸糖，當時覺得好神奇，因為呢隻糖自從細路時食過之後，好似絕哂跡，周圍都唔見有得賣，但近排居然俾我喺「大昌」度發現到佢嘅蹤影喎！
你哋細過果陣時有冇食過呢種爆炸糖呢？記得第一次食嘅時候勁驚呀！媽咪俾我食果陣又唔講俾我聽係乜，一放入口，無幾耐就 "噼哩啪啦" 係咁爆，當時仲以為發生咩事，以為條脷會爆損哂，勁驚囉！媽咪佢就喺度睇我個表情同反應！
毛豆話，佢喺關島買果隻同呢隻係一模一樣，當地維起港紙差唔多廿蚊包，我喺「大昌」買就只係 $8.5 包，而且仲係 "so" 咗 o添呀！點解咁講？因為俾完錢 check 番張單時，發覺每包係 $9.4，咁我當然同個 cashier 講啦！佢叫個同事去貨架 check 價，原來係佢哋唔記得轉番個價錢牌，之後果位職員立即將 $8.5 個牌拎走，叫收銀俾番 $1.8 我，咁你話我係咪 "so" 咗呢！之後再有人買的話，肯定要照番 $9.4 一包 o架喇！
我一次過買哂兩隻味道，呢隻係青蘋果味。
而呢隻就係士多啤梨味。
兩隻味夾埋成 40 包咁多，最啱就係要嚟送俾小朋友喇！
細個時有食過呢隻爆炸糖嘅朋友，呢隻兒時味道又鉤起你哋幾多嘅童年回憶呢？
終於買左啦...
回覆刪除真係好奇囉..我去關島前都未見過有呢隻貨既.返左黎冇耐就見好多間都入哂貨了...係關島US$3.x/包呀...你幾蚊買到簡直筍啦...但我係有D士多見仲有一包粉末+1枝波板糖咁家....
[版主回覆03/21/2011 17:48:00] 嘩，妳真係勁蝕喇！！！ 點解會有粉末加枝波板糖 嘅 ？
我細個都唔係呢個包裝既. 無個人樣架, 係橙色底, 一包好細包.
回覆刪除[版主回覆03/21/2011 17:45:00] 嘩，咁妳都記得！？
唔記得有冇淨爆炸糖買添...淨係記得有隻棉花糖中間有爆炸糖既
回覆刪除[版主回覆03/23/2011 23:24:00] 棉花糖中間有爆炸糖咁正？呢個我反而未食過喎！
真係好有童年回憶呀......
回覆刪除[版主回覆04/06/2011 14:48:00] 一講出 嚟 ，我 哋呢輩 嘅朋友都好有 feel 呀！ 除 咗爆炸糖，「雀目牌」 嘅雪糕蛋糕都係另一兒時味道，集體回憶呀！