焦糖合桃抹醬 Caramel Walnut Sauce

        之前喺「煤氣烹飪中心」度學整果三樽橙皮果醬，卒之都差唔多食哂喇，所以我近排開始搵果醬食譜。

        睇番手頭上嘅果醬食譜，發現有一個抹醬好吸引我，唔單至係味道吸引我，連用料都非常吸引呢！因為呢個抹醬係用到淡忌廉去整，而且個分量啱啱好差唔多就係我盒 cream 用剩嘅份量，再加上係用我至愛嘅合桃，做法又簡單，咁唔整都對唔住自己啦！

材料：
合桃          40 克
淡忌廉      200 毫升
糖              200 克
水              65 毫升

- 合桃洗淨，用抹手紙索乾水份，放入焗爐用 160 °C 焗 10 分鐘至香，切碎備用。

- 淡忌廉同合桃碎倒入煲內，煮滾後離火。

- 水及糖倒入另一個煲內，用中火煮滾，邊煮邊搖煲身。

- 當糖水煮成深啡色焦糖後，倒入淡忌廉中拌勻。

- 將混合物立即倒入碗內，座凍水攪拌至完全冷卻後即可倒入玻璃樽保存。

食譜出自《鮮美果醬輕鬆做》。

除咗以前喺「麥記」度食過焦糖新地外，我都無乜
接觸過焦糖，所以其實唔係太清楚咩味。

 
 
 
 
 

味道有啲苦，唔知正常係咁味道，定係我煮過龍呢？
而且奶味好濃，呢個醬都係唔係我杯茶哦！

 

 

 

Notes：

- 當焦糖倒入淡忌廉時會不斷起泡，所以最好用一個較深嘅煲處理，以免材料溢瀉。

- 玻璃樽需預先消毒處理，方法請參考《玻璃樽消毒方法》。

- 根據食譜，抹醬完成後必須完全冷卻才可入樽保存，否則餘溫會令抹醬味道變苦。