火鎗

        每次買盒淡忌廉返嚟，如果用到最後仲有剩而心目中又無乜特別嘢想整的話，又會用埋嚟整雪糕，因為整雪糕用勁多 cream，真係多多 cream 都可以清得哂。但係天氣凍時就梗係唔會整雪糕食啦，咁就會改為整 Crème brûlée，同樣可以好快手用哂盒 cream，但整 Crème brûlée 的話，最緊要就係有支火鎗燒焦糖，否則就同食中式燉蛋差唔多。

        正當我準備問 Louisa 借火鎗之際，有日老豆返到嚟突然同我講話佢個 friend 俾咗枝火鎗我用，我問點解，佢話佢個 friend 用過一次之後就決定唔再用喇，因為覺得好恐怖、好危險，而對方又知我有整開嘢食，知我實會有用，所以咪送咗俾我囉！

        查實我自己都好驚用火鎗，所以之前兩次問 Louisa 借返嚟都係由我老豆負責 "揸鎗"，我只係從旁 "啊吱啊唑"，哈哈！！ 雖然唔係成日都會用到，但係當要用起上嚟就唔駛再問人借咁煩啦！

        Winnie，妳要整 Charlotte aux poires 嗎？可能支火鎗妳會用得多過我呀！