自家製紅咖喱醬 Homemade Red Curry Paste

        噚日喺等緊個麵包發酵嘅時候，我又開始郁手整另一樣嘢喇！

        之前為咗煮青咖喱雞而買咗包檸檬葉，但係買一包雖然只係幾蚊雞，但係就有好多片，用極都用唔完，上星期整香煎魚餅伴泰式酸辣汁時，又再用多幾片，但依然仲有得剩，既然都未變壞，又無理由掉咗佢嚟，於是就搵搵食譜，睇吓有冇機會可以用埋佢。最後，我揀咗一個我都幾鍾意嘅醬料嚟整，咪就係紅咖喱醬囉！

材料：
紅辣椒                                  8 隻
蔥                                         6 條
蒜頭                                      6 粒
香茅                                      2 枝
葛縷子 ( Caraway seed )      1 茶匙
芫荽籽 ( Coriander )             2 湯匙
南薑 ( Galangal )                  2 湯匙
魚露                                      2 茶匙
青檸汁                                  2 茶匙

青檸皮茸                              2 茶匙
檸檬葉                                 6 片
蝦醬                                     1 茶匙
油                                         5 湯匙

以上材料份量可做咖哩醬 250 毫升。

- 紅椒、蔥、蒜頭同香茅洗乾淨，切碎；南薑去皮後磨茸；檸檬葉洗淨切絲。

- 燒熱 3 湯匙油，爆炒紅椒、蔥、蒜茸、香茅及葛縷子約 3 分鐘至金黃色。

- 將炒香材料盛起，放涼後倒入食物處理器內。

- 加入芫荽籽、南薑茸、魚露、青檸汁、青檸皮茸、檸檬葉及蝦醬，攪打至幼滑。

- 燒熱 2 湯匙油，加入醬料，煮約 5 分鐘至濃稠即成。

食譜出自《Classic Curries》。

一路煮就一路流口水，啲味道香到呢……

 

 

        煮好之後立即試味，無錯喇，就係我心目中想要果隻味道！記得之前第一次食紅咖哩時，已經被佢特別嘅味道吸引住，同一般黃咖啡味道唔同，無咁濃列，較為淡少少，但就多咗一份香氣同微酸味，原來係因為落咗青檸汁，好醒胃呀！跟足呢個份量做出嚟嘅紅咖喱醬都幾辣喎！

 

 

Notes：

- 煮料時必須不時攪拌，以免焦燶黐鑊。

- 用嚟裝咖喱醬嘅玻璃樽需預先燒毒處理，方法請參閱《玻璃樽消毒方法》。