2011年3月21日星期一

自家製紅咖喱醬 Homemade Red Curry Paste

        噚日喺等緊個麵包發酵嘅時候,我又開始郁手整另一樣嘢喇!

        之前為咗煮青咖喱雞而買咗包檸檬葉,但係買一包雖然只係幾蚊雞,但係就有好多片,用極都用唔完,上星期整香煎魚餅伴泰式酸辣汁時,又再用多幾片,但依然仲有得剩,既然都未變壞,又無理由掉咗佢嚟,於是就搵搵食譜,睇吓有冇機會可以用埋佢。最後,我揀咗一個我都幾鍾意醬料嚟整,咪就係紅咖喱醬囉!




材料:
紅辣椒                                  8 隻
蔥                                         6 條
蒜頭                                      6 粒
香茅                                      2 枝
葛縷子 ( Caraway seed )      1 茶匙
芫荽籽 ( Coriander )             2 湯匙
南薑 ( Galangal )                  2 湯匙
魚露                                      2 茶匙
青檸汁                                  2 茶匙
青檸皮茸                              2 茶匙
檸檬葉                                 6 片
蝦醬                                     1 茶匙
油                                         5 湯匙

以上材料份量可做咖哩醬 250 毫升。

- 紅椒、蔥、蒜頭同香茅洗乾淨,切碎;南薑去皮後磨茸;檸檬葉洗淨切絲。

- 燒熱 3 湯匙油,爆炒紅椒、蔥、蒜茸、香茅及葛縷子約 3 分鐘至金黃色。

- 將炒香材料盛起,放涼後倒入食物處理器內。

- 加入芫荽籽、南薑茸、魚露、青檸汁、青檸皮茸、檸檬葉及蝦醬,攪打至幼滑。

- 燒熱 2 湯匙油,加入醬料,煮約 5 分鐘至濃稠即成。

食譜出自《Classic Curries》。



一路煮就一路流口水,啲味道香到呢……

 


 
        煮好之後立即試味,無錯喇,就係我心目中想要果隻味道!記得之前第一次食紅咖哩時,已經被佢特別嘅味道吸引住,同一般黃咖啡味道唔同,無咁濃列,較為淡少少,但就多咗一份香氣同微酸味,原來係因為落咗青檸汁,好醒胃呀!跟足呢個份量做出嘅紅咖喱醬都幾辣喎!
 
 

Notes:
- 煮料時必須不時攪拌,以免焦黐鑊。


- 用裝咖喱醬玻璃樽需預先燒毒處理,方法請參閱《玻璃樽消毒方法》。
 
 

 

3 則留言:

  1. 你漏左黃薑..
    [版主回覆03/22/2011 01:11:00]        唔知呀,我果個食譜無用黃薑喎!

    回覆刪除
  2. 我用剩嘅檸檬葉會放入冰格,下次都可做番。
    [版主回覆03/22/2011 01:13:00]         我都試過放上冰格呀,但係拎番出 嚟用時發覺雪到瘀哂喎!

    回覆刪除
  3. 當然唔係擺咁內啦,泰國嘅咖哩好像係黃姜做黃咖哩,红椒做紅咖哩,綠椒做綠咖喱。
    [版主回覆03/23/2011 23:33:00]        但買一包真係有好多片,用極都用唔完呀!好難短時間用哂!         原來係咁樣做,多謝賜教呀!

    回覆刪除