2010年6月12日星期六

雪地黑森林蛋糕 Snowy Land Black Forest Cake

    早前接老豆個農場 friend order,幫佢做個黑森林蛋糕,要今日做好交俾佢,因為佢對仔女都係呢個月生日 o架,我諗今晚佢哋應該會攪個 birthday party。所以我噚日好忙呀,一早起身食完早餐就入元朗老人中心教 choir,落堂就即刻趕返開工;到夜晚七點鐘就再出去教 Ryan,之後返到嚟繼續執埋手尾,做埋少少裝飾,到夜晚 10:30 pm 先至攪掂哂食 dinner。


    今次呢個蛋糕無賺錢 o架,只係收番材料成本,因為平時老豆都成日喺農場度拎啲蔬菜、生果之類返嚟,當打個和啦!


    雖然屋企長期有朱古力存貨,但今次都係第一次整朱古力蛋糕咋!我參考咗 Tony Wong 嘅做法,朱古力海綿蛋糕用分蛋法整;而朱古力忌廉就雪過夜先至打發。



朱古力海綿蛋糕

材料:
蛋黃   138 克
蛋白   115 克
糖   115 克
低筋麵粉   27 克
可可粉   31 克
粟粉  27 克
油   58 克


- 所有粉類過篩 3 次;蛋黃加 57 克糖拌勻。


- 蛋白用電動打蛋器打至起泡,將剩餘58 克糖分次加入,打至企身。


- 將 1/3 蛋白加入蛋液內輕手拌勻,之後篩入粉類拌成麵糊。


- 將少量麵糊同油混合,拌勻;其餘 2/3 蛋白加入麵糊內拌勻。


- 將已拌油之麵糊倒回主麵糊內,拌好,倒入已包好牛油紙嘅蛋糕圈內。


- 放入已預熱至 180 °C 嘅焗爐內焗約 25 - 28 分鐘。


- 出爐後將蛋糕倒轉攤凍。





車厘子糖水

材料:

罐頭黑櫻桃 ( 車厘子 )
櫻桃酒 ( Kirsh )   24 克


- 將車厘子隔清糖水,瀝乾備用。


- 取 100 克車厘子糖水與櫻桃酒拌勻即成。



車厘子忌廉


材料:
淡忌廉  192

14
櫻桃酒  8 克

- 淡忌廉同糖混合,用電動打蛋器打起。


- 加入櫻桃酒,繼續打至企身。


朱古力忌廉

材料:
淡忌廉   365
糖   15 克
朱古力   65 克


- 淡忌廉加糖煮滾後熄火,倒入朱古力中,慢慢攪拌至朱古力完全溶解。


- 攤凍後放入雪櫃雪一晚。


- 第二日用電動打蛋器打至企身。


組合

- 蛋糕切去表面硬皮,之後平均切成兩片。





- 車厘子糖水倒入噴壺內,將糖水噴濕蛋糕底面兩面。





- 喺其中一片蛋糕上抹上車厘子忌廉,然後均勻放上車厘子粒。


- 再抹多一層車厘子忌廉,之後放上另一片蛋糕。


 



- 用朱古力忌廉抹上蛋糕面及側面。


- 喺忌廉面撒上朱古力碎或朱古力粒,再加以裝飾,完成。


以上材料份量可做 8 吋圓形蛋糕 1 個。




刻意撒上白朱古力碎及用結霜覆盆子造出雪地效果。


 



個人好鍾意呢塊金色生日牌,好有金屬 feel



Notes:
- Tony Wong 話用分蛋法整嘅海綿蛋糕比全蛋法嘅蛋糕較硬身,即使掃上糖水都唔
  會影響蛋糕質感。另外,朱古力忌廉雪過夜,口感會更加滑。


- 蛋糕噴上糖水,有保濕作用,令蛋糕保持軟身。


- 如果唔想有酒精成份的話,可以唔落櫻桃酒。


- 要做到結霜效果,先將覆盆子洗乾淨、抹乾水份,之後放上冰格保存,到用時拎出
  嚟自然有結霜效果,但只能維持短時間,因霜雪會喺室溫溶化。



    你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans 啦! 


6 則留言:

  1. 咁趕都有貨交 ,勁啦.....
    我都鐘意分蛋法, 冇咁實 ,鬆化好多 , 你應該加多層仲正呀......
    塊生日牌好似銅牌咁 ,仲有字體都好靚.....
    主人家收到一定好開心啦......
    [版主回覆06/12/2010 22:54:00]        無法啦,又唔可以預早整定,為 咗個蛋糕,我之前已經參考過好多食譜,仲睇 咗好多 Youtube o添呀, 諗好哂所有步驟, 噚日一開工就 嗱 嗱淋係咁整喇!         蛋糕無得食,唔知鬆化與否,淨係食 咗 切落 嚟果塊蛋糕皮咋,不過都好好食喎!         係呀,呢個生日牌係金屬係列,好靚呀!         希望壽星仔、壽星女鍾意啦!         不過,其實有少少 嘢激死我 o架,我都有 諗過應該買 9 吋底托盤定係 8 吋 o架,問烘焙店 啲職員又話買番 8 吋得喇,咁咪信佢囉,點只整好哂個蛋糕之後,可能抹哂 cream,黐哂朱古力碎,大 咗好多,放唔落個底托盤呀,攪到個蛋糕凌空咁 喺個盤上,仲整到 啲 cream 變 咗形呀!!我叫我老豆交俾個 friend 時同佢講聲唔好意思囉!

    回覆刪除
  2. haha=] thanks your cake
    我地收到個蛋糕喇^^整得好靚呀,,好中意=]
    不過d生果酸左少少=]但真係好好味~~多謝哂
    [版主回覆06/14/2010 00:18:00]        唔駛客氣,妳 哋 鍾意就得啦,我仲擔心你 哋嫌個蛋糕 "黑蚊蚊" 唔夠靚 o添!         面頭朱古力 cream 好無味呀,會唔會苦過頭?我落重料俾妳 哋 o架,當係我送朱古力係妳 哋兩個做生日禮物啦,哈哈!  不過 啲 raspberry 酸我都無辦法,因為係新鮮生果 嚟 o架!車厘子就係罐頭糖水浸 嘅!         送上遲來的 Happy Birthday!

    回覆刪除
  3. 正到無話可說呀!
    [版主回覆06/13/2010 23:35:00]        嘩,妳咪 氹我開心啦 ,妳整俾姨甥果 啲蛋糕靚過我呢個多多聲啦 !仲有我最鍾意 嘅栗子蓉 o添呀!

    回覆刪除
  4. 好靚呀,  多謝你講得咁清楚。我都試過加了Cream 個蛋糕大個個底托盤呀, 激死。
    [版主回覆06/13/2010 23:32:00]        唔駛客氣,我都想同大家一齊分享!有時我又會參考番你 哋 啲食 譜嘛!大家互相交流呀!         係啦,當我一擺個蛋糕落去個底托盤時,即刻激到 "啤" 一聲呀!

    回覆刪除
  5. 好好味呀~~我又唔覺得苦啵^^正到呀
    [版主回覆06/16/2010 18:44:00]        咁就好喇,因為我自己習慣食黑朱古力,所以驚自己唔覺苦,已經叫我老豆試一試味,佢話唔苦,咁我就話,如果你 哋一家人 都覺得太苦的話就唯佢事問!

    回覆刪除
  6. haha~~我地黑朱古力都冇咩大問題呀^^  90%以上先覺苦
    [版主回覆06/18/2010 16:45:00]        嘩,乜你 哋咁勁 嘅,我試過買 85% 朱古力返 嚟整甜品,食完覺得好苦,唔係好頂得順呢!  咁你 哋要挑戰 吓 99% 喇!

    回覆刪除