2011年3月13日星期日

紅麴發糕

        聽日係婆婆嘅生日,以往每年都會同埋媽咪、老豆一齊去探佢,仲記得媽咪成日都話,去完呢次之後清明就唔再去喇,反正都相差無幾耐日子,費鬼事到時又再同人迫!

        媽咪走咗之後,呢幾年我都有正日去探婆婆,但係依家就自然會探埋媽咪啦!所以今日我就特地試整咗個紅麴發糕,準備聽日帶過去探佢哋。
 
 



材料:
低筋麵粉      135 克
粘米粉          75 克
泡打粉          8 克
紅麴粉          2 茶匙
糖                  60 克
溫水              155 毫升
 
- 麵粉及泡打粉過篩後與粘米粉混合好;溫水與糖混合拌至糖溶。

- 糖水倒入粉料內拌勻成麵糊。

- 將麵糊倒入已墊紙模嘅模內約八分滿,之後將模放入蒸籠。

- 煲滾水,放上蒸籠,用大火蒸約 15 分鐘即可。
 
以上材料份量約可做發糕 6 個。


呢兩個就帶去探婆婆同媽咪。

 





裂紋爆得唔夠靚,理想嘅裂紋應該好似細個
果陣時玩「東南西北」咁款。

 


        有啲食譜就話泡打粉最遲先落就爆得靚啲;有啲食譜就粘米粉份量多過麵粉,可能筋性相對低咗會爆得勁,下次再試吓唔同嘅食譜至得!

 

Notes
- 粘米粉毋須過篩,因粉粒本身已經非常幼細。

- 蒸糕時必須要用大火才可做到靚靚裂紋。

- 發糕蒸好後須趁熱脫模放涼,否則糕底會因積聚水氣而變得過濕。
 

 

5 則留言:

  1. 呢個糕好有心意呀!
    紅鞠是什麼來呢?
    [版主回覆03/15/2011 01:28:00]        多謝你呀!         紅麴其實係乜我就真係唔太清楚,應該係五穀雜糧之類,類似高梁,可以用 嚟釀酒。既係天然著色料,又係健康食材,可以降血壓、降膽 固醇同抗氧化。

    回覆刪除
  2. 為左呢個糕,你專登去買紅麴呀..咪有排用囉...
    [版主回覆03/15/2011 01:13:00]        咁又唔係,查實係上次見「二記」做特價,買 咗返 嚟都未用過,咁咪 拎 嚟用 吓囉!其實只係好細包 o架咋,而且 嚟緊煮 餸都會用佢呀!

    回覆刪除
  3. 發得好好呀....
    [版主回覆03/15/2011 01:29:00]        我覺得唔夠發呀, 嚟 緊最期六會再試多次!

    回覆刪除
  4. 好似草莓蛋糕啊!
    [版主回覆03/15/2011 01:30:00]        係呀,我一路攪粉漿時都覺得好似整緊草莓蛋糕咁!

    回覆刪除
  5. 緊張大師-小女人2012年9月2日 上午9:53

    上面那照片你都蒸得好靚呀有三岔口呀,但你份材料比我要多,等我又試下你所講看看整後會如何?
    [緊張大師-小女人回覆10/01/2012 18:52:10]真係舊相識老朋友啦,好似我同我的朋友仔識了三四十年..友誼可貴
    [版主回覆10/01/2012 03:14:58]佢係我以前教琴行時嘅同事嚟㗎!之後又跟相同老師學琴,一路識到依家囉!
    [緊張大師-小女人回覆09/23/2012 08:13:30]係,絕對可以死心啦....我好日都唔會入去的,但點解咁好你二個都住同一區,巧合到咁既?
    [版主回覆09/21/2012 23:43:59]我同佢都係住屯門㗎!妳可以死心喇!
    [緊張大師-小女人回覆09/20/2012 15:39:58]嘩,希望Winnie家不要太遠,咁我可以駕車去買都抵呀.女人見到平字就瘋狂.但真係平五元差好遠喎.
    [版主回覆09/19/2012 23:06:42]我喺香港買㗎,Winnie 屋企附近有間糧油雜貨批發賣嘢好平,我好多時都去買,真係乜鬼都有,幾乎講得出嘅都有得賣,連烘焙食材都有!
    大椰漿一罐超市賣$15以上,佢賣$10咋!
    [緊張大師-小女人回覆09/19/2012 19:57:25]紅麴係台灣見到都唔平架,可惜可惜,但我知好有益,我去台灣一定會再買的
    [版主回覆09/17/2012 23:30:29]原來係咁!
    今日摷食材時,見到包紅麴發哂,都無乜點用過就差唔多成斤掉哂,激死人!!
    [緊張大師-小女人回覆09/04/2012 18:10:50]我唔想架,但次次睇到蒸出來咁靚郤被倒汗水破壞了你咪話唔勞氣,其實蒸籠可以做好多食品,所以無問題出席機會好高架
    [版主回覆09/02/2012 19:50:43]妳真係講究,要專登走去買個蒸籠。
    [緊張大師-小女人回覆09/02/2012 16:08:05]好,等我試一下,因為我想買個蒸籠架,但現在仲未有出去旺角,我蒸好同你講
    [版主回覆09/02/2012 13:55:22]但係妳嗰啲爆得靚好多喎!
    好呀,妳又試整一次,睇吓係我技術差定係個譜有問題!

    回覆刪除