2011年3月21日星期一

雙籽仁提子乾全麥包 Mixed Seeds & Raisin Whole Wheat Bread

        日試用中種法嚟整麵包,不過焗完之後無即刻食,專登留番今日先食,因為想睇吓成品係咪真係會軟熟啲兼老化情況無咁嚴重。



中種麵糰


材料:
高筋麵粉      100 克
全麥粉          100 克
即用酵母      4 克
糖                  5 克
水                  160 克



主麵糰


材料:
高筋麵粉      50 克
鹽                  2 克
糖                  10 克
橄欖油          10 克



配料


材料:
南瓜籽         15 克
葵花籽         15 克
提子乾         30


- 種籽仁放入已預熱至 140 °C 嘅焗爐內焗 15 分鐘;提子乾用清水浸至軟身。


- 將中種麵糰材料倒入兜內,拌勻後冚上保鮮紙,發酵約 2 - 3 個鐘至兩倍半大。


- 中種麵糰發酵完成後,將主麵糰材料加入中種麵糰內,混合後搓成麵糰。


- 加入橄欖油,繼續搓揉及摔打成光滑麵糰,之後包入配料。


- 將麵糰滾圓,放入已灑粉嘅兜內,冚好保鮮紙發酵 30 分鐘。


- 將麵糰排氣,分割成 2 份,滾圓後蓋上保鮮紙,鬆弛 10 分鐘。


- 麵糰按扁、拉開,左右兩邊向中間摺入,黏緊收口。


- 將麵糰放上已墊入爐防黏紙嘅烤盤上並蓋上保鮮紙,發酵約 45 分鐘至兩倍大。


- 用水輕輕噴濕麵糰表面,灑上高筋麵粉,用利刀割紋。


- 放入已預熱至 200 °C 嘅焗爐內焗 22 - 25 分鐘即成。



        天氣凍要整包的話,我習慣會將麵糰放入爐內校 40 °C 發酵,點知噚日老貓燒鬚,麵糰放入爐作最後發酵後我就洗嘢,一路洗嘢,一路聞到麥香味,心知不妙啦,即刻按製 check 吓爐溫,原來校錯咗去 100 °C 呀,仲已經開始5 分鐘 o添!! 嚇到我即刻熄爐兼立即將個麵糰拎番出嚟,打開爐門攤番凍個爐。心諗,呢鑊衰硬喇,咁高溫度,啲酵母實死哂啦!! 不過無理由就咁就丟咗去 o架,之後咪照樣放番入爐發酵囉,點知又無事喎,仲發到豬仔咁大隻 o添,好好彩無丟咋!不過到割紋時就發現問題喇,原來表面已經焗乾硬咗,所以割得唔係咁好,睇番上面幅相就知喇!


        用中種法整包,個麵糰都係比較濕,我放入食物處理器度搓麵糰都幾危險,中軸都有捲到麵糰入去,差少少就好似上次咁搓埋入機身呀!!下次再整時都係要預先扣起少少水,寧願太乾唔夠水份時先加好啲。


 



包肉果然軟熟好多喎!不過因為呢個麵包都用咗幾多全麥粉,
纖維比較多,唔係太能夠反應到真實果種軟熟程度,
下次試試唔加全麥粉先。


 



又係 tea-lunch 時間,加杯肉桂咖啡,今日呢個 dayoff
已經覺得好享受喇!
 


 


Notes
- 浸提子乾時千祈唔好用酒浸,因為酒精會殺死酵母。


- 天氣太凍時,可將麵糰放入爐內發酵,並於麵糰下置一盤熱水,提升爐內溫度,
  有助發酵。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans 啦!


4 則留言:

  1. 正...
    [版主回覆03/22/2011 01:14:00]        咁妳又過 嚟整件啦!

    回覆刪除
  2. (Empty)
    [版主回覆03/23/2011 23:21:00]        咁吸引!?

    回覆刪除
  3. 到左第三日, 我估計都老化得好犀利了.........
    中種, 慢發酵我都試過, 對老化都冇乜大幫助呢......
    [版主回覆03/27/2011 03:01:00]        係? 啲書 成日話用中種整會無咁快老化 嘅!我之後都已經放 咗入雪櫃,今日焗番熱 嚟食都係差唔多咋!

    回覆刪除
  4. 雖然個爐set左100度, 但係麵團入面有排都heat唔到, 不過表面乾左真係幾大件事..唉, 我都試過眼瞓時整野烏龍百出呀..
    [版主回覆04/01/2011 15:22:00]        我以為 啲酵母 勁易死,仲 10 0 °C 咁高溫 o添!         我都成日烏龍百出,一時又唔記得將材料份量減半,一陣間整麵包又唔記得落老麵 ………

    回覆刪除