家常便飯

呢排幾乎日日都落過雨，就算唔落雨都係天陰陰咁，真係又濕又翳悶，攪到我已經做咗 "人肉天文台" 好幾個禮拜，而且頭痛亦發作頻密咗，所以週末呢幾日都無乜心機煮飯，求其煲個湯，鑊都無乜點開，全部蒸餸就算數喇！

既然天氣咁鬼濕，要煲番個袪濕湯袪一袪水至得喇！講明要袪水，粟米鬚
同粟米衣當然要用埋嚟煲湯啦，加埋老黃瓜、紅蘿蔔、粉葛、土伏苓
同炒扁豆，雖然無落肉去煲，但個湯都非常之清甜，
唔講仲以為狂落蜜棗㖭呀！！

其實原本打算煲夠 4 碗湯就算，反正一個人飲，已經可以飲兩餐，但明知
咁少水一定蓋唔過材料，所以加夠可以煲成 6 碗湯嘅水，點知都仲係
唔夠，最終都要加到可以煲成 8 碗的水量先勉強蓋過！其實只係
一隻老黃瓜、一隻紅蘿蔔、一嚿仔粉葛加兩條超迷你粟米
咋嘛，咁就已經成煲滿，攪到我要飲足 4 餐
先飲得哂，真係人都癲呀！！

上次整蘿蔔糕時，預多咗一條臘腸用唔哂，於是就用嚟整呢個金針雲耳
臘腸蒸雞。依家買餸真係好貴，反而買隻冰鮮芝麻雞仲抵食，
$30 一隻雞，加埋其他配料已經夠食兩、三餐。

跟住就係久未露面嘅豉汁排骨蒸南瓜，一向唔係太好肉嘅我，當然
醉翁之意不在酒啦，而係索咗肉汁嘅南瓜，本身已經
好清甜，加埋肉汁同豉汁就更加惹味哦！

正當我喺度揀緊啲開邊南瓜時，菜檔阿姐叫我唔好揀嗰啲，因為唔靚，
叫我細細哋買哂呢個佢，我話咁大個一個人點食得哂呀，佢之後話
先食有瓤的一邊，將無瓤嘅頂部包好放入雪櫃，可以擺到成個
禮拜咁話。既然阿姐咁關照我，而開咗邊嗰啲南瓜又真係
唔多掂，個個都幾乎白色咁滯，咁我當然會
聽佢話買哂成個啦！

阿姐果然無介紹錯喎，呢個超金黃，超靚呀！



















唔怪得之個個都話

幫嚫開嗰檔就唔好再周圍去買，雖然平時同啲阿姐都無乜點
social，但因為買慣買熟，佢都會認得我，而且可能
因為見我一個後生仔嚟買嘢，好多時都會主動
幫我揀啲較為靚少少嘅，又會教我點樣煮，
甚至教埋我點樣可以保存耐啲，有好多
嘢如果佢哋唔講，我都真係
唔知、唔識呀！

仲有嘅就係齋鹵味，甜酸麵筋今次加咗少少茄膏落去煮，顏色即刻
靚好多，而且味道更加似去齋舖食嘅；至於咖喱麵筋，今次就
落重料去煮，唔單只有咖喱粉，仲落埋黃薑粉、芫荽粉
同辣椒粉，味道好正呀！！