2009年11月4日星期三

教學上的兩件開心事

       咗琴咁耐,我都好少會因為學生嘅表現而會開心,可能係因為我啲學生都唔係太有天份果隻啦!但最重要嘅係,我一直都覺得,學好鋼琴根本就係佢嘅份內事,係佢嘅責任,所以彈得好,根本唔需要開心。

        但噚日就有啲唔同,我真係由心咁開心出嚟,仲係同一日內有兩件事發生 o添!


開心事件 (一)
        噚日喺快餐店排隊等買嘢食時,無聊望吓個電話,發現原來收到個 SMS message 都唔知,之後打開一睇,原來係我其中一個 8 級學生 send 俾我,佢話俾我聽佢啱考完琴試出,佢好開心遇到個好考官,但在此之前,佢遇到一個好老師,所以要特別多謝我!我睇到呢到,我真係好開心。


        開心,唔係因為佢讚我好,唔係因為佢識刷鞋,而係開心佢明白我、了解我,無因為我經常鬧佢而唔鍾意我!坦白講,佢絕對唔係一個叻學生,又無天份,又無時間練琴,我收佢學費又唔係特別高,無得睇錢份上,俾著第二個,根本唔會再教佢,真係啋你都傻!但我仍然堅持繼續教佢,唔介意佢接收到幾多,總之,我會無私咁完完全全 share 哂我嘢俾佢,點解?因為佢都一樣咁堅持,堅持自己嘅理想,堅持自己鍾意嘅音樂!!佢對音樂嘅熱誠,絕對不下於當年嘅我!


        之前講佢學習嘅弱點,佢自己都絕對好清楚,對如我呢個咁好火兼脾氣唔好嘅 "藝術家",佢真係受我唔少氣,俾我鬧咗唔知幾多次,但對我都毫無怨言 ( 可能只係我自己單方面咁,佢心裡頭其實好憎我,呵呵!) 可能係因為佢都好清楚我份人,我雖然係好惡,但我唔係隨便鬧人,老實講,我同我媽咪都一樣,俾我鬧得嘅人,其實喺我哋心裡面所佔嘅地位一定唔低,無番咁上下地位,根本唔值得我哋去鬧佢、去緊佢。我相信,我呢個學生就完全明白呢一點,所以先會咁容忍我、包容我,我都要喺呢度同佢講聲:Lo Ming,so sorry for my bad temper!


        記得佢之前有次仲好攪笑咁問我,點解見我鬧其他學生,但係就唔鬧佢,希望我都可以鬧佢 ( 呢個世界真係有人咁犯賤,鍾意俾人鬧!?講笑吧 !) 佢嘅意思,相信大家都已經好清楚。

        一個咁識體諒自己,咁欣賞自己嘅學生,一百個之中,又有得幾多個呢?
 


 


開心事件 (二)


        一向都唔係好鍾意學琴Arthur,噚日居然令到我好開心,真的,我真係好開心!


        由我初初開始接手教 Arthur 時,我完完全全 feel 到佢係被迫學琴,因為佢上堂時真係好 hea,好唔願意去練習一啲相對以前較為難嘅片段;feel 到佢係好抗拒學琴,因為每次無論同佢傾得幾投契,無論玩得幾開心,做好哂一切 warm up 工作,只要講一聲「好啦,我哋上堂喇!」,佢就即刻表演國粹 — 四川變臉,由好開心、好 relax,即刻變到好無癮、好無奈;feel 到佢係好怕學琴,因為佢之前個阿 sir 係非常之惡,惡過我都不在話下,就連 Louisa 都好怕佢,跟本唔敢同佢接觸 ( 哈,原來我都唔係好惡啫!) 所以初期同佢上堂時,佢都長期同我講佢有幾怕之前個阿 sir。


        因為各種原因,加上 Louisa 同我事先已經講好佢對 Arthur 嘅要求同期望,我就知道我要點去同 Arthur 相處,點樣去教佢。時間慢慢咁過,一路以嚟,我都睇到佢喺學習上嘅改變同成長。由開始同佢練習考試歌,佢無論接觸到咩曲目,彈過抑或未彈過都好,佢總係會先講句:「咁難,我實唔得啦!」但係慢慢、慢慢咁耐心教佢,忍氣吞聲咁對佢 ( 因為我知道我自己惡,但我唔可以用呢招對佢,因為佢之前一直都唔多接納學琴,某程度上都係因為之前個阿 sir 太惡,令佢更加抗拒 ),卒之見到佢有改善,而且仲慢慢對彈琴建立起自信,連 Winnie 幫佢考過幾次 mock exam,都話佢唔太差,一定會 pass,就連佢自己一直最驚sight-reading,依家都可以彈得有板有眼,拍子準確不在話下,就連音準都好好多,甚至可以一粒音都無彈錯,我真係覺得好安慰,起碼,對 Louisa 都叫做總算有個交代吧!


        嚟緊禮拜五就正式考琴試,所以噚日就係考試前最後一次上堂聽佢彈考試歌,當然,水準唔會太差,但總怕會臨場失準,所以我長期性都同學生講,要預咗考試當日表現會有 50% discount。上完堂之後,Arthur 居然同我講咗一樣嘢,佢話佢自己其實知道自己首考試歌彈得唔好,咁我就問佢,咁點解明知道都唔做好呢?佢就話佢依家已經改唔到,跟住我就問佢點知道自己有問題,佢話佢因為練琴時喺個琴嘅反影睇到自己手指啲動作做得唔好,攪到啲音黐實哂,唔夠清晰!嘩,我聽完之後,真係好突然,完全無諗過佢會由唔願學琴變到自覺去了解自己做得唔好嘅地方,唔單只咁,上完堂之後仲同我傾吓佢考完試之後想學啲咩新歌,俾著係你,聽到佢呢番話,會唔會非常感動呢?我真係開心到唔識講嘢!


        到 Louisa 夜晚返嚟,我都有同佢講番成件事,點知 Louisa 又再講多樣嘢俾我聽,原來 Arthur 佢自己都有同人講佢點 plan 佢嘅鋼琴考試,仲話考完 8 級會考埋 diploma!聽埋呢句,我個心就更加開心,更加甜到 "漏" 啦!估唔到佢短短一年間就有咁大轉變!當初我同 Louisa 相量俾佢考試,其實都只係想佢有個學習目標,有點學習推動力,如今,我嘅目的可以話已經達到。


        希望 Arthur 真係可以繼續 keep 住呢道 "火",慢慢學好鋼琴,咁我就可以多個目標人物俾我去 share 我嘅學習心得,就算佢未必做到嘅 "代表作" ( 當年我媽咪就係咁去形容 Ryan o架啦,因為以前Ryan 真係好乖、好叻、好聽話,但係依家就 …… 唉!) 但我都希望真係可以陪佢考埋個 diploma 囉!


        Arthur,good luck to your piano exam on Friday!


6 則留言:

  1. 嘩 聽到Arthur 咁有目標  真係由個心到甜出o黎 
    祝佢星期五考試順利
    [版主回覆11/06/2009 17:34:00]        希望佢可以考到好 啲成績啦!

    回覆刪除
  2. 多謝晒你兩個呀 ! 不過,我又要煩Arthur讀書既野呀,唉,我本來以為呢個世界上冇咩野可以難到我架啦,依家知道啦,就係做人阿媽真係好難。
    [版主回覆11/06/2009 17:45:00]        駛乜多謝呀,我係佢老師,我有責任 o架嘛!         哎呀,順其自然啦!讀書唔掂,或者佢第二樣 嘢出色呢 !         我咪又係讀書唔叻兼懶,我個 degree 都係呃番 嚟咋 !但我知道 喺我媽咪心目中,讀書唔叻唔緊要,最重要係唔好做個 "白走一場" 嘅人呀!Arthur 都唔係妳 諗得咁差 啫,好似我之前同妳講,食完餐飯之後我就覺得好大個 咗, 諗 嘢都無咁細佬仔啦!起碼佢都識同我講,自己就算幾唔鍾意食蔬菜都唔可以唔食囉,識反省、思考,仲差得去邊呀!!

    回覆刪除
  3. 看完好感動......
    感動係在於你對教學的執著....熱誠.......
    學生進步...改變.....固然感動...
    但沒有你鍥而不捨......真心......專業.....
    就沒有今日的他們.......
    你的"惡死"同純惡死.......學生係識分嘅.....
    他們也是給你感動......
    當年我有你這樣的教琴老師就好了.....
    多一點你這樣的教學老師...社會也應少一點問題青少年......
    也請你keep 住這團火..........
    [版主回覆11/06/2009 17:52:00]        好多謝 B 妳 嘅支持呀!我都只不過係 攞個心出 嚟教學,坦白講,對於果 啲唔識欣賞兼成日嫌你煩 嘅學生,我打死都唔會咁好耐性對佢 哋,簡直係 嘥氣!教 咗琴差唔多廿年,乜到見過哂、乜都睇化哂喇,果團火,已經熄滅 咗一半有多,想再燃起,真係好靠學生互相配合呀!

    回覆刪除
  4. 呢d先係教學生涯既最大得著^^
    [版主回覆11/06/2009 17:33:00]        係呀,講得無錯!

    回覆刪除
  5. 感動.....
    [版主回覆11/06/2009 17:32:00]        嗯,小C9,好耐無見啦喎,做乜潛水咁耐呀?

    回覆刪除
  6. 你好叻呀…教琴!
    [版主回覆11/09/2009 01:58:00]        我都係 "呃" 餐飯食咋!

    回覆刪除