金針雲耳炒絲瓜

        呢個係我噚日即興之作，點解咁講呢？因為平時習慣逢禮拜五返屋企之前，都會去街市買定禮拜六嘅餸，咁禮拜六就唔駛專登落街買餸，教完琴之後就可以 stay 喺屋企做吓嘢。

        不過，因為前日唔駛返老人中心教合唱團，所以無出到街，到挨晚教完 Ryan 之後又已經好夜，街市都收哂檔，根本無餸賣；到咗禮拜六果日，天氣又凍咗好多，更加唔願落街買餸啦，所以就匿喺屋企，死諗爛諗，希望諗到一樣餸出嚟係可以利用屋企嘅 "存貨"，咁就可以 "逃過一劫"，唔駛落街捱凍啦！當然，我唔會因為自己嘅偷懶而要我老豆食罐頭做餸啦！

        哈，諗吓諗吓，點知真係俾我諗到喎，真係開心到死呀！ 咪就係呢碟金針雲耳炒絲瓜囉！金針、雲耳係乾貨，屋企有 "存貨" 都唔出奇，之但係連絲瓜都有 "存貨" 就真係出奇啲喇，查實係我老豆上個禮拜喺農場拎返嚟嘅，原本佢話自己煮嚟食，點知煮咗成個禮拜都未煮，仲放喺雪櫃度，咁就益咗我唔駛落街買餸喇！而我屋企個冰箱就長期都會有鮮腐皮雪定喺度，方便隨時解凍後就可以煮齋，於是我就加埋佢落去一齊玩 "即興"，"jam" 咗呢碟餸出嚟。

材料：
絲瓜
金針
雲耳
鮮腐皮
蒜茸
薑絲
紅椒

調味料：
鹽
糖
雞粉
蠔油

- 金針同雲耳先用水浸發、洗淨，之後汆水、瀝乾水份，備用。

- 腐皮輕輕略沖洗，然後撕成細塊。

- 絲瓜刨去硬皮後切件。

- 燒熱油，先爆香蒜茸、薑絲同紅椒，之後加入絲瓜一齊炒。

- 加入小量水，冚鑊蓋將絲瓜稍為煮至軟身。

- 之後加入金針、雲耳同調味料，兜炒後再加埋腐皮落鑊，炒勻所有材料。

- 最後灑上小小麻油，兜勻，熄火，上碟。

Notes：
- 將金針、雲耳汆水，可去除 "噏" 味。

- 絲瓜毋須煮得太腍身，可保留清甜、爽脆 口感。

- 鮮腐皮落鑊後切勿煮太耐，如果唔係就會煮到爛哂。