2009年11月7日星期六

蒸水蛋時蛋與水嘅份量比例

        之前媽咪唔舒服嘅初期,其實我已經開始正式幫手煮飯,果陣時仲係好生手,始終都仲有媽咪喺我後面 "垂簾聽政",所以對煮食仲係未有深入研究,媽咪教我點做就跟住做吧。


        記得一次,媽咪真係完全放哂手等我自己攪掂,果晚,我就係整蒸水蛋。看似簡單不過嘅家常餸菜,我都有本事失敗,蒸極都唔可以凝固,於是就梗係立即求救啦!後來媽咪話番俾我聽,我先知原來加水嘅份量係有一定比例 o架!


        聽媽咪講,如果蛋液跟水嘅比例為 1:1,咁就一定成功,但如果想有更加嫩滑嘅質感,就要再加啲水 o添,但係,最多都只可以加一倍半份量水,亦即係蛋液與水嘅比例為 3:2,再多的話,就會好似我之前咁,蒸極都唔會凝固 o架啦!

        仲有,我記得媽咪話過一定要用凍滾水,如果就咁用生水會做唔成喎!不過到依家我都唔敢試,唔知係咪真係唔掂呢?


        自此之後,我就永世都記得呢個蒸水蛋"黃金比例"!所以有時做嘢真係唔駛太介意失敗,失敗過後汲取經驗,咁樣印象就更加深刻。


3 則留言:

  1. 3隻蛋用300克液體(200雞湯+100g水),加小小salt.. 蒸10-12mins(加錫紙) 勁滑!
    [版主回覆11/09/2009 00:45:00]         妳都好有研究喎,有機會又跟 吓 妳個方法整 吓先!         多謝分享

    回覆刪除
  2. 你上面話 -
    但如果想有更加嫩滑 嘅質感,就要再加 啲水 o添,但係,最多都只可以加一倍半份量 嘅 水,亦即係 蛋液與水 嘅比例為 3:2
    係咪應該 水與蛋液 比例係3:2
    [版主回覆11/11/2009 14:46:00]        係呀,bingo!         清楚 啲咁講 ,一份蛋液,最多只可以溝一份半 嘅水,即如果 100 ml 蛋液,最多只可以加 150 ml 嘅清水或清雞湯,如果唔係,就會好似我上次咁,蒸極都唔凝固 o架喇!

    回覆刪除
  3. 我就鍾意2:1,1份蛋、1份雞湯、1份水
    蒸完好似嫩豆腐咁滑~~^^
    我食得淡口,果1份雞湯已經夠味,所以冇再加鹽。
    [版主回覆06/27/2012 21:13:59]有機會再試試先!
    [Ghosy Lei回覆06/26/2012 00:24:41]完全冇問題
    我打左蛋就倒落量杯,3隻蛋加300ml 水,中火蒸10分鐘左右
    水蛋內亦冇其他會吸水的配料,次次都凝固到~~^^
    [版主回覆06/24/2012 00:51:43]2 份液體加 1 份蛋 OK 嗎?我試過撞板喇,蒸極都唔凝固,所以自此以後,我最多加1 份半液體。

    回覆刪除