2010年11月24日星期三

人試人愛的合桃香蕉蛋糕

        一直都好鍾意食自家製香蕉蛋糕,唔落香油都香味四溢,而且食味同蛋糕質地都好合心意,為食貓呢個食譜真係超正,呢兩個禮拜已經整咗兩次喇!



        因為上星期係伯伯嘅生日,所以做個合桃香蕉蛋糕俾佢做生日蛋糕。因為老人家佢有糖尿病,唔食得太甜,所以將部份黃糖用黑糖代替,因而蛋糕色澤比較深。伯伯好似唔係好 buy 啲鬼佬蛋糕,食咗一細嚿就無再食喇,但伯娘就一味讚好食,食完一嚿又一嚿。唔知點解,整嚫香蕉蛋糕都好似硬係要長方形咁嘅,由於呢次係當做生日蛋糕,所以我就刻意用圓模嚟整,"打破傳統" 呀!


 



老豆早前講過,如果整開香蕉蛋糕的話就整一條俾佢個農場 friend
咁所以應佢要求,另一半麵糊就整送俾佢個 friend 喇!
咁呢次自己就無份 lu!


 



        上次咪同大家分享過,老豆一個跟我素未謀面嘅舊同事去旅行時買咗個陶笛送俾我做手信嘅,佢實在好有我心,所以今個禮拜我又專登整番條合桃香蕉蛋糕送俾佢做回禮,因為呢次係要嚟送禮,所以面頭灑番少少糖霜,望落好睇。我成日都覺得,呢個香蕉蛋糕最啱就係要送俾一啲唔係太清楚對方口味嘅人做拌手禮,相信應該無人會唔鍾意,除非對方根本唔鍾意食西式嘢,又或者係佢唔鍾意食香蕉,咁就真係無得好講啦!所以送香蕉蛋糕俾人應該算係最穩陣 o架喇!剩低果一條蛋糕,今次卒之自己都有份享用喇。


        其實唔單只我鍾意食呢個香蕉蛋糕,曾經食過朋友、學生、甚至同事,都無一不讚,唔係講笑,整呢個蛋糕送俾人,真係可以扮哂專業 o架 !!但實情係,烘焙世界裡面,其實算係最低級,最無難度可言 o架喇,只係果啲對烘焙完全無認識嘅人就會覺得你好掂囉!!! 


        有興趣想試整嘅朋友,請參考番之前香蕉蛋糕食譜,又或者直接 click 番上面為食貓條 link 啦!


11 則留言:

  1. 我鍾意食香蕉,但係香蕉蛋糕就麻麻地.............覺得怪怪的.........
    可能未遇到過好味既啦.........
    [版主回覆11/25/2010 02:18:00]        呢個好食 o架,真材實料,唔係用香精油整。

    回覆刪除
  2. 灑咗d糖霜好有聖誕氣氛呀!
    [版主回覆11/27/2010 13:49:00]        又係喎!

    回覆刪除
  3. 個樣好 pro 呀, 而且對於我依啲懶既人就梗係好味啦
     
    [版主回覆11/27/2010 13:49:00]         所以點解我話可以扮專業呢!

    回覆刪除
  4. 但事實上, 係好多人唔食香蕉/香蕉製品架~我以前就有幾個同事係咁, 一D食蕉唔食蕉製品, 一D唔食蕉但食蕉製品…
    糖尿病可以食黑糖咩?
    [版主回覆11/27/2010 13:47:00]          咁當然唔係所有人都食香蕉啦,但起碼比較穩陣 啲囉!          其實佢都係食少少 o架咋,同埋黑糖相對白砂糖 嘅甜度會低好多。

    回覆刪除
  5. 合桃香蕉蛋糕, 又香, 又好食.   見到您的蛋糕, 好想食呀.  要做, 要做.
    [版主回覆11/27/2010 13:44:00]        咁快 啲郁 手啦!

    回覆刪除


  6. Happy Thanksgiving my dear!













    編輯HTML源碼







    [版主回覆11/27/2010 13:43:00]       Happy to your family!!

    回覆刪除
  7. 我又試!
    [版主回覆11/30/2010 11:11:00]        請妳食啦!

    回覆刪除
  8. 牛油蛋糕或者朱古力蛋糕或者戚風唔會大路d咩?
    [版主回覆11/30/2010 11:15:00]        牛油蛋糕咁寡!同埋我知有人都好似我咁怕奶類製品 嘅羶味。         朱古力蛋糕?我表妹就唔多好囉!但我又無 諗過喎!         戚風就真係唔係人人 啱喇,好多人都嫌佢太濕,而且脫模後我要做多 啲功夫去洗呢!

    回覆刪除
  9. 朱古力我都唔o岩, 不過真係好多人鍾意, 搞到我成日整d自己唔鍾意既野…XD
    奶都多呀, 芝士仲多~
    牛油蛋糕整得好點會寡~(提子乾, 合桃同蕉都有人唔食, 蕉都算多人唔食架, 我老公以前都唔食架~8個同事當中就有5, 6個唔食蕉製品~)
    戚風反而我未遇過唔鍾意個喎, 唔一定濕架嘛~睇你用咩譜~可以調節調節~而且個模亦唔難整呀~浸一浸
    [版主回覆11/30/2010 11:37:00]        咪係囉!查實整 嘢俾人食都真係唔易,人人口味都唔同,唔同走去問人 哋鍾意食咩, 我就無哂 surprise 啦!         所以我其實幾抗拒奶類製品 o架,好多時食完之後個口真係 "臭" 足一日,好難頂!!不過無法啦,整西點一定要用,依家好多時用固體菜油代替部份牛油囉,味道無咁濃。         今日我老豆先同我講,佢個同事係食香蕉 o架,不過但凡係煮過 嘅水果都唔鍾意食!         牛油蛋糕我整得唔好嘛!因為我怕果 "朕" 味,所以我買嚫 嘅牛油,對其他人 嚟講係乜味都無,但我已經覺得有少少想嘔喇!         起碼我自己同我表妹都唔好雪芳。整其他蛋糕可以用防黏模或墊入爐紙,一定乾手淨腳過整雪芳囉!

    回覆刪除
  10. 我反而覺得要用牛油紙/不黏布好麻煩:P
    咁你一定唔食天使蛋糕啦~仲有金桶牛油
    我都識人食蕉但唔食香蕉蛋糕呀~ 熟左既水果完全唔同味~
    我整海綿蛋糕都係落液體菜油~
    [版主回覆11/30/2010 12:18:00]        牛油紙點會麻煩呀,摺完就攪掂,焗好脫模後一沖水就 OK!         係呀,我個 friend 講我食過一件天使蛋糕,我食第一口就已經有少少反胃,不過唔好意思唔食,唯有一路食、一路想作嘔!所以上次佢用金桶牛油整曲奇時,千叮萬囑我一定唔可以食!         如果果樣 嘢係用牛油液 整的話,我一定會用橄欖油代替!

    回覆刪除
  11. 可惜有好多野唔可以用其他野代替牛油呀~
    要裁要鋪麻煩呀, 雖然有D不黏布裁定O係度, 我都係寧願洗模, 不黏布咪同個模一樣咁洗~
    [版主回覆11/30/2010 13:11:00]        咁果陣咪被迫用番牛油囉!         我用入爐紙 o架,或者用防黏模,防黏蓆只會用 喺無油脂製品。

    回覆刪除