2011年6月6日星期一

香蕉朱古力蛋糕 Banana Chocolate Cake

        心水清嘅朋友都應該會留意到,我用嘅食譜大多數都係喺圖書館借番嘅,因為好多時一本食譜其實只係想要當中嘅某幾個,我係絕對唔會為某幾個食譜而買成本返嚟,最重要係,屋企根本唔會有咁多地方擺書,如果真係本本都買的話,我諗我真係要去租個迷你倉先掂囉!


        所以,如果我都買得嘅食譜,一定係有九成我都好鍾意或者好想整,《香港人氣甜品》就係少數我會買嘅食譜之一,因為裡面個個食譜都好正,而且跟佢整過好多個甜品都必定成功兼好食,對佢比較有信心,所以我跟呢本食譜整得最多。噚日我就跟佢整個香蕉朱古力蛋糕。



朱古力蛋糕


材料:
低筋麵粉      110 克
梳打粉          1/2 茶匙
可可粉          2 湯匙
牛油              100 克
糖                  90 克
水                  80 毫升
雞蛋              3 隻
朱古力          80


- 麵粉與梳打粉、可可粉分別過篩;牛油室溫放軟;朱古力座熱水溶化。


- 牛油加糖用電動打蛋器打至發白,之後加入朱古力粉拌勻。


- 雞蛋逐隻加入攪拌,加一半粉料入內拌勻,再拌入一半水。


- 將剩低嘅粉料同水分別拌入,最後加入朱古力拌勻。


- 將麵糊倒入已墊入爐紙嘅模內,放入已預熱至 170 °C 嘅焗爐內焗約 40 分鐘。


- 出爐後放上架上放涼,待用。



香蕉餡


材料:
香蕉              4 隻 ( 約 600 克 )
檸檬汁          30 毫升
檸檬皮茸      少許
牛油              100 克
糖                  90 克
魚膠片          3 克
冧酒             10 毫升


- 香蕉切片後加檸檬汁及檸檬皮茸拌勻;魚膠片用凍水浸軟。


- 牛油放煲內煮溶,之後加入香蕉片,用中慢火煮約 8 分鐘。


- 加糖,攪拌均勻並呈半透明狀態時倒入冧酒,離火後放入魚膠片拌勻。


- 原煲放涼備用。



朱古力忌廉


材料:
淡忌廉          220 克
朱古力          60 克
水                  15 毫升


- 水加熱,放朱古力入內攪拌至完全溶化。


- 淡忌廉用電動打蛋器打至企身,再拌入朱古力溶液,攪拌均勻。


- 將朱古力忌廉放入雪櫃內保存待用。



朱古力淋漿


材料:
淡忌廉          150 克
朱古力          125 克
牛油              15 克
蜜糖              2 茶匙


- 淡忌廉加熱,加入朱古力及牛油拌勻。


- 拌入蜜糖後攤凍備用。



組合


- 將蛋糕平均切成三片,將其中一片抹上朱古力忌廉,再放上半份香蕉餡。


- 放上第二片蛋糕,同樣抹上朱古力忌廉及剩餘香蕉餡,再放上最後一片蛋糕。


- 將剩餘嘅朱古力忌廉抹勻整個蛋糕,之後放入雪櫃內雪 30 分鐘。


- 蛋糕雪凍定形後,將朱古力淋漿淋上蛋糕面,之後放番入雪櫃內雪至凝固即成。


以上材料份量可做直徑 8 吋蛋糕一個。


食譜出自鄭慧芳、胡玉玲編著嘅《香港人氣甜品》。





之前整蛋糕同香蕉餡時已經用清哂啲牛油,到最後整朱古力淋漿時
就無得用,諗住用橄欖油代替都得啩,因為用量
只係好少,點知原來真係唔得 o架,攪到啲油
同朱古力溝唔埋,真係功虧一簣!!


 



呢個 A 貨 Awfully Banana Chocolate Cake 個賣相雖然樣衰
但係味道就好接近,唯一唔同嘅,應該係
唔同牌子嘅朱古力。

 


Notes
- 食譜中嘅水,於原食譜為牛奶;檸檬皮茸只係我自己加入。


- 我今次用半份材料做出一個直徑 5 吋半蛋糕。


- 如果想煮熱嘅材料快啲攤凍,可以座凍水加快冷卻。


- 由於熱氣比較熱,淡忌廉最好座冰水打發,會比較容易打至企身。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


7 則留言:

  1. 豬油膏
    [版主回覆06/06/2011 16:48:00]        咩意思?

    回覆刪除
  2. 個面白白哋好似豬油哦!裏面香蕉又白白哋....咪似豬油膏囉! 不過你唔駛理豆記呀...佢咩嘢有香蕉都唔 like 架喇!好味咪得囉!會唔會好甜呢?
    [版主回覆06/12/2011 18:50:00]        原來係咁解!         又唔會好甜喎,我俾個 Winnie 同 Louisa 食,佢 哋都話好味,又唔會太甜,Winnie 仲話估唔到香蕉同朱古力咁夾。

    回覆刪除
  3. 溶朱古力千萬不要加水, 是為大忌!
    [版主回覆06/12/2011 19:05:00]        整朱古力淋漿時,我無加到水呀,只係無牛油,用橄欖油代替咋。

    回覆刪除
  4. 無理由架,朱古力同應該混得好好架,你係倒苟去之後變成雲可,定係倒之前已經係咁?
    我估可能係唔夠熱啦,所以泛白,下次遇到咁打比我丫嘛(我可能叫你倒左佢XD)或者你應該再加熱~
    [版主回覆06/12/2011 19:10:00]         Cream 已經加夠熱 o架喇,當我一倒橄欖油落去,攪來攪去都混合得唔均勻,後尾唔理咁多,照淋上面,果陣時已經見到 啲油走番哂出 嚟,漏哂 喺個蛋糕底度,到雪凍完就變成咁鬼樣,Louisa 話朱古力 係唔可以同橄欖油混合喎!

    回覆刪除
  5. 呀太解釋左何謂豬油膏啦...真係太了解我啦... 依家先睇清個譜...古力同水絕對大忌..只可以用cream or milk溶古力...你真係完全冇sense... ..
    [版主回覆06/12/2011 19:13:00]        妳就真係無 sense!!擘大妳對豆豉眼睇清楚啦,我何來加水落朱古力度呀!做乜連妳都係睇到我加水 o架?我睇 咗好多次都無打錯字,究竟妳 哋係咪鬼掩眼呀 !

    回覆刪除
  6. 對!好多時一本書只有幾款喜歡,而且有時跟足步驟做都出問題!有發現就是好事! 內層做得好好.....
    [版主回覆06/12/2011 19:14:00]         多謝妳讚賞呀!         所以我真係好少買書囉!

    回覆刪除
  7. - 食譜中 嘅 水 ,於 原食譜為牛奶;檸檬皮茸只係我自己加入。 發瘟啦你...呢個係咪水字呀...
    [版主回覆06/13/2011 00:40:00]        妳發雞盲 o架,依家出事 嘅係朱古力淋 漿呀,根本都唔駛用水,係朱古力忌廉先至有落水咋嘛,況且個朱古力忌廉都完全無事,唉!

    回覆刪除