上次喺《冷藏儲存香蕉 I》都同大家分享過將香蕉急凍保存嘅方法，但係發覺原來香蕉擺得耐始終都會變深啡色，而且之後解凍仲會勁出水，所以上次個方法都係唔夠完美。後來我試吓連皮一齊急凍，睇吓會唔會好啲，可以擺更長時間都唔變色，結果 ……
將香蕉拎出嚟室溫解凍，表面即刻結霜。
溶雪後睇到，成隻蕉都係一樣變到深啡色。
但剝開蕉皮後，裡面嘅香蕉肉仍然係非常雪白 o架，成功！！
下次你哋想將香蕉急凍的話，記得連皮一齊雪喇！到用之前預早 30 分鐘拎出嚟室溫解凍，等到蕉皮稍為軟身就可以剝皮，千祈唔好等到佢完全解哂凍先剝皮呀，因為其實香蕉經冷藏後已經變成一嚿 "冰"，到完全解凍後就會幾乎化為水，完全用唔到 o架啦！所以一定要趁佢仲係少少硬身就即刻 "夾硬" 剝皮，雖然係會難剝啲，但係個質地就可以 keep 到好似新鮮香蕉咁 o架喇！
無嗱嗱做乜鬼急凍唧？即買即食或整蛋糕咪好囉！
回覆刪除[版主回覆06/28/2011 02:55:00] 一次過買一梳蕉返 嚟，一齊熟 、一齊變黑，咁咪食唔切囉！放上冰格就最好不過喇！
好方法!! 我多數去晒皮放入密實袋, 之後入雪箱!!!
回覆刪除[版主回覆06/28/2011 02:56:00] 咁可以放到幾耐都唔變色呢？
係呀...家下好難買蕉咩..
回覆刪除[版主回覆06/28/2011 02:59:00] 我多數等買超市平價蕉 o架！一來平好多，正價 $3.X 一磅，平價蕉唯起都只係 $1.9 - $2.2 一磅。二來就係可以唔駛等太耐就已經出梅花點，慳好多時間，簡直係平靚正啦！