菠蘿吞拿魚薄餅 Pineapple & Tuna Pizza

        每次喺餐廳食 pizza，我都一定會揀厚批底，因為食過一次薄批，覺得過份香口同比較乾身，完全唔係我杯茶，但其實薄批先至係正宗意大利風味。

        以前未識整包時，一直都以為薄批同厚批嘅整法，分別在於將麵糰擀薄與否，但睇過食譜先知，原來係唔落糖之餘仲要增加鹽嘅份量，藉此抑制酵母嘅活躍度，減低麵糰發酵程度，從而令麵糰變得較薄。

麵糰材料：
高筋麵粉                195 克
水                           約 100 毫升
即用酵母                1.5 克
鹽                            3 克
橄欖油                    10 克
粟米粉                     適量

 

餡料：
千島醬                     適量
Mozzerella 芝士      適量
罐頭吞拿魚             半罐
罐頭菠蘿                 適量
油浸番茄乾             3 件

金不換                     適量

- 將麵粉同酵母混合好，慢慢加水拌勻，再將鹽加入，攪拌均勻。

- 一邊倒入橄欖油，一邊慢慢搓成糰。

- 枱面灑上乾粉，將麵糰放上，繼續搓揉及摔打成光滑麵糰。

- 將麵糰滾圓，放入已灑粉嘅兜內，冚好保鮮紙，發酵 40 分鐘。

- 將麵糰排氣，之後再次滾圓，同樣放入兜內並冚好保鮮紙，鬆弛 25 分鐘。

- 與此同時，將吞拿魚同菠蘿瀝乾水份；番茄乾瀝乾油份後切細，備用。

- 再次排氣，並用擀麵棍擀薄成圓形麵皮。

- 雙手拎起麵皮，一邊轉動、一邊將麵皮拉闊、擴大。

- 將麵皮放上已掃油並灑上粟米粉嘅烤盤上，然後用手將麵皮向烤盤四周推開。

- 將千島醬倒入麵皮中間，然後用匙羹以劃圓圈方式將醬汁搽勻。

- 放上部份芝士後就放上其餘餡料，之後再次放上芝士。

- 將烤盤放入已預熱至 200 °C 嘅焗爐內焗 12 - 15 分鐘即成。

 

以上材料份量可做直徑 10 吋薄餅一個。

賣相夠吸引嗎？

餡料非常好味，加埋我至愛嘅千島醬，簡直係食到

唔停得口呀！不過個批底就做得唔夠薄，

又唔夠脆，要再鑽研一下至得！

除咗 pizza，我仲用薯仔、蘋果同青瓜

整咗個簡簡單單嘅通粉沙律。

 

 

 

 

 

 

Notes：

- 若想自製油浸番茄乾的話，可參閱《油浸番茄乾》。

- 於烤盤上灑上粟米粉，除可做到防黏之外，亦可令到批底更加香脆。

 

- 所有濕材料必須徹底瀝乾水份或油份，避免麵糰過濕，影響口感。