素薑醋

        早幾個月，翻睇番香港電台電視節目《味之天下》，其中一集叫做《「素」造新生活》，係講關於素食，裡面提及到有齋薑醋呢樣嘢，我即時雙眼發光，因為我其實都鍾意食薑醋，特別係雞蛋，覺得好好味，但係一諗到要處理豬手或者豬腳，就真係無乜興趣去整，但 Louisa 話過唔落豬手或者豬腳，會唔好味，所以一直都無諗住整，依家知道有齋薑醋呢樣嘢，咁就唔同講法喇！節目裡頭講嘅齋薑醋係用番薯、麵筋、薑同花生一齊整嘅。

        而咁啱係一個多月前，正當我上網想搵多啲煮齋薑醋嘅資料時，又俾我發現多一樣嘢，原來有好多人都會用鹹蛋嚟煲薑醋，話好食過用雞蛋整，就連已故食家梁玳寧對鹹蛋薑醋都讚不絕口。喺好奇心驅使下，我即刻郁手浸鹹蛋，咁一個月後嘅今日就可以試到鹹蛋薑醋喇！

 

材料：
薑
麵筋 ( 水筋 )
五香鹹蛋

甜醋

- 薑刮皮、洗淨，切件後用刀拍鬆。

- 燒熱鑊，薑放白鑊兜炒至乾身。

- 將甜醋放入瓦煲內，煲滾後加入薑，用慢火煲 15 - 30 分鐘，熄火後原煲攤凍。

- 第二日將薑醋翻煲，煲滾後用慢火煲 15 - 30 分鐘，熄火後原煲攤凍過夜。

- 麵筋洗淨、切件，放白醋水內汆水，之後過冷河；鹹蛋烚熟後剝殼，備用。

- 薑醋煲滾後，將麵筋同鹹蛋放入薑醋內，慢火煲 15 - 30 分鐘，熄火後原煲攤凍。

- 第四日，將薑醋翻熱，同樣用慢火煲 15 - 30 分鐘，即可享用。

鹹蛋果然好食，一啲都唔鹹之餘，仲有種好特別嘅甘香。
至於麵筋就變得硬身好多，好似食緊齋鴨腎咁樣！ 

Notes：

- 煲薑醋切忌用金屬煲，因為醋酸會同金屬產生化學作用。

- 翻煲時間長短，需視乎薑醋多少而決定。

- 如果鍾意味道較酸的話，可以加入適量黑米醋。

 

- 參考文章：梁玳寧《中山特色鹹蛋薑醋》。