芥末薯蓉雞肉包 Mustard Mashed Potato & Chicken Bread

        我間中都會買「Panash」嘅薯仔脆法包，因為香口之餘，又有法包嘅煙韌口感。早前搵麵包食譜時，發覺原來自己都有一個類似嘅食譜，今日我就參考咗嗰個食譜，改一改材料兼加以變化，就整咗呢個芥末薯蓉雞肉包喇！
 

 
材料：
高筋麵粉            200 克
低筋麵粉            50 克
糖                       5 克
鹽                       5 克
即用酵母            5 克
水                      約 150 毫升
固體菜油            5 克
雞柳                   2 條
細薯仔               1 個
芥末籽醬            適量
日式沙律醬        適量
羅勒                   適量

醃料：
鹽
黑椒粉 

- 薯仔去皮、切片；雞柳起筋、洗乾淨，用抹手紙索乾水份後，用醃料醃 30 分鐘。

- 薯仔同雞肉蒸熟，之後雞肉切粒；薯仔壓成薯蓉。

- 將芥末籽醬同沙律醬加入薯蓉內拌勻，再將雞肉粒拌入，攤凍備用。

- 將麵粉、糖、鹽、酵母及水混合搓成糰，之後加入固體菜油搓至起筋。

- 繼續搓揉及摔打成光滑麵糰，放入已灑粉嘅兜內，包好保鮮紙發酵 40 - 45 分鐘。

- 將麵糰排氣，滾圓後再次發酵 20 - 30 分鐘。

- 完成第二次發酵後，將麵糰平均分割成 4 份，每個約重 100 克。

- 將小麵糰分別滾圓，鬆弛 10 分鐘。

- 用擀麵棍將小麵糰擀薄，每個包入薯蓉餡約 40 克後捏緊收口，放上已墊防黏入爐
  蓆嘅烤盤上，蓋上保鮮紙，最後發酵約 40 分鐘。

- 麵糰發酵至兩倍大後，用較剪喺麵糰表面剪開一個十字缺口至見到薯蓉餡。

- 透過缺口，將羅勒灑上薯蓉上，之後用水噴濕麵糰表面。

- 放入已預熱至 180 °C 嘅焗爐內，噴蒸氣，焗約 25 - 30 分鐘。

- 開始焗後 5 分鐘再噴多一次蒸氣，繼續焗至表面金黃即可。

以上材料份量可做直徑約 5 吋麵包 4 個。
 
 
 

今次個包表面焗極都唔上色，唔知係咪

因為用咗固體菜油嘅關係呢？

 

 

 

 

 

 

第一次整呢款做形，覺得幾得意。

 
 
 
 
 
 

啲薯蓉係呢個包嘅靈魂，味道調得不錯，令單調嘅法包帶點色彩！

Notes：

- 薯仔蒸熟後最好趁熱、趁軟身壓成薯蓉，會比較容易。

- 鍾意的話，可將醃好嘅雞肉切粒，之後放入鑊內炒熟，會比較香口。

- 除沙律醬及芥末籽醬外，可隨意拌入自己喜愛嘅醬料，甚至唔拌入任何醬料亦可。

- 噴蒸氣可令麵包表面變得香脆，如果鍾意食軟包的話，可以唔將麵糰噴濕及噴蒸
  氣。