2011年8月22日星期一

杏仁豆漿雪芳蛋糕 Almond & Soya Milk Chiffon Cake

        嚟緊個冰格會放好多嘢,迫爆咁滯,所以呢幾日已經開始清存貨,今日就清蛋白。

        如果有蛋白剩的話,我自己就鍾意要嚟整雪芳蛋糕,因為蛋白用量係比蛋黃多,用剩出嘅蛋白整的話,咁就唔駛有蛋黃多出,超方便哦!



材料:
低筋麵粉     
60 克
杏仁粉         50 克
蛋白             4 個
他他粉         少許
蛋黃             3 個
糖                50 克
橄欖油         30 毫升
豆漿            50 毫

- 麵粉與杏仁粉混合好,過篩 3 次。

- 他他粉加入蛋白內,用電動打蛋器打至起泡。

- 將其中 30 克糖分 3 次加入,打成蛋白霜,之後放入雪櫃保存。

- 蛋黃加糖,用電動打蛋器以低速拌勻,之後分別拌入橄欖油同豆漿。

- 篩入麵粉同杏仁粉,拌勻成麵糊。

- 將 1/3 份蛋白霜加入麵糊內,低速拌勻,之後加入剩低蛋白霜,用膠刮拌勻

- 將麵糊倒入模內,然後枱面輕敲數下,釋出較大氣泡。

- 放入已預熱至 180 °C 嘅焗爐內焗約 25 - 30 分鐘,出爐後立即倒扣攤凍。

- 脫模後即可享用。

以上材料份量可做直徑 17 厘米蛋糕 1 個。


    我自己習慣先打蛋白,後打蛋黃,因為可以洗少次打蛋器嘛!但係天氣咁熱,就算將打好蛋白霜放入雪櫃,我都怕會消泡,所以今次就刻意加入咗少少他他粉,希望提高其穩定性,唔知係咪因為咁,今次個蛋白霜特別打得靚,夠挺身、夠綿密之餘,仲好有光澤 o添呀!

 


蛋糕一路焗緊時已經聞到好香濃嘅杏仁味。

 



食落口就仲更加香,因為 mix 埋豆漿嘅清香,真係香到
唔識點形容呀!兩個字講哂,好味!
 
 


Notes
- 如果無他他粉的話,可用檸檬汁或白醋代替。

- 可將豆漿改為清水,份量相同。

- 將蛋白霜拌入麵糊時必須輕手,以免弄破蛋白霜內嘅氣泡,影響蛋糕受熱膨脹。
 

3 則留言:

  1. 好鬆軟喎...加左杏仁粉最正....
    [版主回覆08/22/2011 16:20:00]        好 嘢喎,睇張相就知道鬆軟,可能係因為個蛋白霜打得好!         我都幾鍾意杏仁粉整 嘅食物。妳食過「M & S」隻杏仁餅未?如果食過的話,咁妳識唔識整呀?

    回覆刪除
  2. 咁好味仲整兩件過嚟咬吓....?
    [版主回覆08/24/2011 17:04:00]        妳太遲喇,已經化 咗 渣喇!妳準備咬緊 嗰 個啦!

    回覆刪除
  3. Looks yummy! 改成用榛子粉可以嗎?份量是否相同呢?thx.
    [版主回覆11/21/2011 15:22:23]絕對無問題啦!不過個人覺得,榛子粉香味遠不及杏仁粉香啊!

    回覆刪除