2011年8月15日星期一

法國麵包 Baguette

        好多 blogger 都話整法包好難整得好,所以我一直都無試過整,不過近排心思思想試吓整,睇吓自己會整到個包有幾樣衰!


        雖然明知自己整法包一定好樣衰,但都唔想衰到貼地,所以先跟本望落好似較為可信嘅食譜會穩陣啲。



麵種


材料:
高筋麵粉      100 克
鹽                  2 克
即用酵母      0.5 克
水                  65 克


- 將麵粉、鹽同酵母混合好,之後加水搓成麵糰。


- 麵糰放入已灑粉嘅兜內,冚好保鮮紙,室溫發酵 1 個鐘。


- 發酵好之後,將麵糰排氣、滾圓,用保鮮紙包好後放入雪櫃雪 1 - 2 日即成。



主麵糰


材料:
高筋麵粉      250 克
鹽                  5 克
即用酵母      1.5 克
麥芽糖          0.5 克
水                  約 165 克
麵種              63 克


- 先將水同麥芽糖拌勻;麵粉、鹽同酵母放入食物處理器內攪拌混合。


- 加入麵種及麥芽糖水,搓成麵糰。


- 拎出麵糰,放喺已灑粉枱面繼續摔打、搓揉成光滑麵糰。


- 將麵糰放入已灑粉嘅兜內,冚好保鮮紙,發酵 1 個鐘。


- 取出麵糰,排氣,平均分割成 份,分別滾圓後,鬆弛 20 分鐘


- 麵糰放上入爐防黏蓆上,最後發酵 1 個鐘。


- 烤盤放入焗爐內一齊預熱至 220 °C。


- 用刀喺麵糰表面割 3 條斜紋,之後連防黏蓆一齊放上已預熱嘅烤盤上。


- 用水噴濕麵糰表面,放入焗爐焗約 20 - 25 分鐘即可。


以上材料份量可做約 9 吋長麵包 3 個。


食譜出自《麵包教科書》。




        落水搓麵糰嘅時候,一下子收唔切手,倒多咗水,又好衰唔衰,包高筋粉用到無哂咁滯,剩番好少,點都要留番啲做手粉 o架,所以攪到個麵糰勁濕、勁瀉身,卒之個包咪咁樣衰囉!不過真係可以做到外脆內軟,好好食,所以呢個譜都應該靠得住,係我自己未夠班啫,如果用埋法包粉去整,應該更加正!


 



即刻將個法包切件,搽上香草蒜蓉醬,入爐再焗多 5 分鐘,
就成為咗蒜香多士喇!
 

Notes
- 原食譜係用法國麵包粉;而主麵糰材料中有加入維他命 C 溶液。


- 用剩嘅麵種可以用保鮮紙包好,放上冰格保存,用之前預先解凍即可。


- 書中提到,硬麵包要做到外脆內軟,麵糰不可過度搓揉,筋性只需達到七成即可。


- 麥芽糖所含嘅澱粉分解酵素有助於酵母菌繁殖


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


4 則留言:

  1. 都唔係好樣衰啫...好味咪得囉!
    [版主回覆08/17/2011 00:13:00]        同街外賣 嗰 啲 比,我呢個簡直影響市容呀!         係呀,自己食,好味就最重要!

    回覆刪除
  2. hi 包包色水好正牙
    [版主回覆08/17/2011 00:12:00]        多謝讚賞呀!

    回覆刪除
  3. 整得唔錯啦...好食咪得囉..係咪先
    [版主回覆08/17/2011 00:11:00]        咁又係呀,反正食 咗落肚都 變 咗 ………

    回覆刪除
  4. 我覺得已經好正噃 ~ 不過中種嫌麻煩哩 !!
     
    [版主回覆08/19/2011 12:46:00]        真係好正!?其實呢次我係第一次整,無乜經驗,都唔知點先為之好,成日都見 啲 blog 友話好難整,所以我都唔知 o架,不過個外貌真係同出邊賣 嘅完全唔同喎,我覺得我呢個好樣衰!         點解整中種麻煩呢?前一日整完放落雪櫃都唔駛理佢喎!

    回覆刪除