2011年8月3日星期三

清洗電熱水壺

        整完檸檬醬檸檬醬罌粟籽蛋糕後,突然間起有樣想同大家分享一下。


        如果屋企有用電熱水壺嘅朋友都應該知道,當熱水壺用一段時間之後,個不銹鋼內膽就會形成一層水穢,喺呢個時候,通常都會買包清潔劑嚟 "洗" 水壺。雖然嗰包清潔劑講明係用檸檬提煉檸檬酸而製成,係可以食用,但係天生 "小心眼" 嘅我,始終對佢都係無乜信心,所以後來我就試吓直接用檸檬嚟清洗,效果相當理想,有過之而無不及 o添,即刻放心哂!!  


        如果想試做的話,唔駛專登走去買個檸檬返嚟試 o架!只要有機會用到檸檬整嘢時,記得將啲頭頭尾尾留起就已經可以 o架喇,真係竟安全又環保呀!



未清洗之前個衰樣,暗啞無光。


 



用檸檬幫佢做 facial — 注滿水後放入幾片檸檬煲滾水。


 



水滾之後再浸一陣間,之後將水倒去,再加入少量凍水,用手 "捽幾捽"
就即刻乾淨番哂,再過一次清水就攪掂。你睇,
即刻靚仔番哂,充滿光澤呀! 


 



查實煲過嘅檸檬水可以留番起 o架!放心,我唔係慳家到叫大家飲番佢,
只係話可以將屋企所有銹鋼煲拎哂出嚟 "曬冷",將啲檸檬水
逐一倒入煲內煲滾,同樣可以幫佢地做 facial 啫!


4 則留言:

  1. 我有試過,其實用菠蘿皮仲好喎.
    [版主回覆08/03/2011 20:39:00]        嗯,乜菠蘿皮都得呀!不過我唔好好咁用,因為太多 "釘" 可以藏污納穢,我怕會洗唔乾淨呢!

    回覆刪除
  2. 白醋+梳打粉又得啦...
    [版主回覆08/04/2011 00:52:00]        用頭頭尾尾 嘅 檸檬方便 啲!

    回覆刪除
  3. 嘩...果然好介紹呀! 因我家是用電水煲煲水的, 早排先用檸檬劑清洗過, 下次我都要試下先得.
    [版主回覆08/07/2011 00:35:00]        用真檸檬好似安心 啲!

    回覆刪除
  4. 咁你有冇順手幫自己做埋 facial 唧?
    [版主回覆08/07/2011 01:57:00]        嘩,呢隻果酸咁勁,妳想我爛面咩!!

    回覆刪除