2009年9月1日星期二

香辣豬骨湯烏冬

        早前Louisa 屋企食過佢煮嘅急凍手打烏冬,非常之好食,同喺日本當地食 shabu shabu 時嘅即製即食新鮮烏冬無乜太大分別,於是就搭 Louisa 幫我買咗包,今日卒之有機會親自煮嚟食喇!



材料:
急凍手打烏冬
急凍粟米粒
蟹柳
本菇
雞蛋
嗚門卷


豬骨濃湯:
豬骨濃縮湯底
海帶
紅椒粒


- 雞蛋先放滾水內烚熟,剝殼後放入已煮開嘅豉油雞汁內,慢火煮多五分鐘,熄火
  攤凍,放過夜浸至入味。


- 海帶洗淨後剪成條狀,用水浸至發大,水留用。


- 粟米解凍後沖水,之後放滾水內煮幾分鐘,撈起瀝乾待用。


- 本菇切去底部,略沖洗後汆水;嗚門卷切片,蟹柳沖水備用。


- 將浸海帶嘅水煲滾,加入豬骨湯底及紅椒粒,煲滾後撈起海帶,即成香辣豬骨濃
  湯。


- 將嗚門卷同蟹柳放入湯內煮熱,盛起。


- 另外煲水煮烏冬,水滾後加些少鹽,將烏冬放入滾水內煮開,等到水再次滾番之
  後,煮多兩、三分鐘就盛起。


- 將雞蛋、海帶、粟米粒、蟹柳、鳴門卷及本菇放喺烏冬上,倒入豬骨濃湯,食
  得!



        烏冬真係好滑、好煙韌,湯底又香濃鮮甜,老豆食過都話好似日本即製烏冬咁滑、咁好食,超正!!除烏冬豬骨濃縮湯底喺日本入口外,鳴門卷、蟹柳同海帶都喺日本貨。



海帶就唔係買嘅,係我老豆個朋友去完日本旅行買返嚟俾佢做手信 o架!



Notes:
- 如果想雞蛋快啲入味,可以用刀喺蛋白四邊輕輕 "界" 開後先放入豉油雞汁內
  煮。


- 烏凍唔駛解凍,就咁直接放入滾水內煮就得。


- 如果用本地海帶的話,就必須先刷洗乾淨表面海鹽。


- 鳴門卷形狀幼且長,最好斜切,可以切得比較大塊。


4 則留言:

  1. 好多料喎!
    [版主回覆09/01/2009 12:00:00]        哈哈,好多料哩!所以原本以為好快手整起,點知由洗洗切切到煮好都用 咗唔少時間。

    回覆刪除
  2. 好吸引阿 ! 就黎食lunch,搞到我流晒口水. 加埋蛋好正!
    [版主回覆09/02/2009 17:11:00]        哈哈,咁你都要自己整 嚟 食,滿足一下啦!

    回覆刪除
  3. 多料到差啲見唔倒有烏冬添呀!
    [版主回覆09/02/2009 17:14:00]        係我自己 "貪靚" 放咁多材料上去影相 啫 !  不過因為我同我老豆就靠哂佢做晚餐,無其他 嘢食喇,慌死唔夠飽,咪勁加料囉!

    回覆刪除
  4. 急凍的日本烏東, 煙煙韌韌, 真係好吃過乾烏冬or中港的雪藏烏冬.
    [版主回覆09/05/2009 02:07:00]        係呀,真係寧捨唔同 o架,而且又唔係貴呀,乾烏冬都要成兩個幾三蚊包啦,呢隻急凍維起都只係 $4 之嘛!

    回覆刪除