與 blog 友交流煮食心得，分享生活點滴。
早前喺中環開咗間麵包店，以賣丹麥麵包味司作招來，印象中，好似未食過丹麥麵包吐司，都好想試吓。不過，對於一個屯門人嚟講，真係鞭長莫及，唔通為咗果包老遠搭長途車去買咩！！
近排先發現，原來「山崎」都有得賣，不過就唔係間間都有，亦唔係時時都有得賣，噚日去 Louisa 屋企時，經過商場間「山崎」見到有得賣，於是就買嚟試吓。
原來唔似食丹麥酥個口感喎！麵包比較鬆軟。
好鍾意佢上邊啲鬢辮做形。
買返屋企食嘅麵包，我習慣會焗番熱先食。今次我開埋個 grill，所以麵包外皮好脆，好好食，而且又無乜牛油味，其他人可能會覺得唔夠香，但我呢個唔好乳製品嘅人，就合哂胃口啦！
我諗呢個丹麥麵包應該係「山崎」咁多吐司方包之中最貴嘅一款，盛惠 $15。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
今晚其實無諗住會整呢個餸 o架，原本係諗住蒸魚嘅，不過去到街市兜咗幾個圈都搵唔到啱食嘅魚，之後喺其中一個魚檔度見到有魷魚賣，$15 兩隻，仲好大隻 o添，而且都算幾新鮮，加上又諗到我個 To Do List 內有個釀魷魚筒想整好耐，咁啱喇，就買佢返屋企啦！
材料：
魷魚
白糯米
黑糯米
蝦米
芡汁料：
蠔油
生抽
麻油
糖
紹酒
粟粉
水
食譜參考自杜紹鵬嘅《米香美饌》。
- 糯米、黑糯米洗乾淨後，浸水 6 個鐘；蝦米洗淨、用水浸軟後切碎，備用。
- 用浸蝦米水撈勻糯米，再拌入蝦米碎，隔水蒸約 30 分鐘至熟。
- 魷魚去衣，切去眼、鬚、軟骨同墨囊，洗乾淨，用抹手紙索乾水份。
- 糯米飯釀入魷魚筒內，然後用牙籤將開口封好，隔水蒸 8 - 10 分鐘至熟。
- 將芡汁料煮滾，之後淋上蒸好嘅魷魚筒上即成。
Notes：
- 原食譜除用蝦米碎之外，仲有用金華火腿碎。
- 黑糯米比白糯米需要較長時間蒸熟。
- 黑糯米唔可以單獨釀入魷魚筒內，因為黏度唔夠，蒸熟後切開時會鬆散，所以一
定要溝白糯米。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
今朝一早天都未光就起身，點解咁早？因為要 9:30am 去到銅鑼灣煤氣烹飪中心度上堂呀！今次跟 Annie 學整脆皮燒腩同埋鹵水豬腳仔，除咗 Louisa 之外，仲有佢果 friend，連家姐都一齊嚟上堂，好開心、好熱鬧呀！！
首先做好插針同醃嘅步驟。
跟住入爐先焗好個底。
翻轉後喺塊皮上面鋪上粗鹽，之後入爐繼續焗。
將表面嘅粗鹽撇走，再插針。
再入爐焗至皮脆。
Annie 仲教咗我哋幾招秘技去整脆個皮。
攪掂，出爐喇！
呢嚿係 Annie 整嘅，佢斬開哂俾我哋試食。好食過燒臘檔買返嚟嘅
燒肉呀！不單之皮勁脆，仲唔會好鹹，味道啱啱好，肉又唔嚡，
勁正囉！
嗱，呢嚿就係我整 o架喇，係咪都幾掂咁呢！！同街賣果啲都差唔多呀！
將自己整果嚿拎返屋企做餸，食之前再入爐焗番脆佢，Hm …… 一樣咁正！
不過可能因為撇唔乾淨面頭啲鹽，攪到個皮勁鹹！！好彩仲脆卜卜啫。
不過之後要做清潔就真係想死囉！！好彩廚房可以用到熱水，如果唔係，都唔知點去清洗乾淨個烤盤、烤架同其他用具。
除咗實習整燒肉，Annie 仲示範咗個鹵水豬腳仔，一樣咁好味！不但好
入味，仲好爽口 o添！呢個都唔難整，我一定會至少整一次 o架！
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
開始進入大製作倒數階段啦！星期一果日，同 Winnie 一齊再去 Louisa 度試整 icing cookies，成品整起好靚，不過，對於我哋呢幾個 "生手技工"，整一塊餅都要用好多時間呢！！
係咪都似模似樣呢！
先焗好曲奇，之後加上一層 icing glaze，最後再用唧袋
唧上 royal icing 就攪掂。Louisa 整果條晚裝裙幾靚！
Winnie 覺得勁好玩囉，係我從未見過佢咁投入去整嘢食 o架，簡直係
"從未如此投入過"！！
果兩塊曲奇幾靚就知啦！
雖然我好清楚知道自己喺唧花呢方面無乜天份，不過 果日我哋都整咗唔少花款呢！ 
都貪得意整咗個蛋糕呀，用最簡單嘅線條就算喇！
原來唧 royal icing 時，最好搵啲 Winnie 所謂嘅 "疆屍手" 去整，因為
原來啲糖霜好易溶 o架，Louisa 揸咗個唧袋一陣間已經攪到
啲糖霜開始溶，唧落餅度嘅糖霜都瀉到睇唔到
線條咁滯！！
之後 Louisa 又教我同 Winnie 唧玫瑰，Winnie 真係好有天份，第一次
唧已經似模似樣，Louisa 話仲靚過佢啲同班同學 o添！我呢個
無天份嘅人就真係想死囉！不單只完全唔似朵玫瑰，仲唧
到一半已經勁手痛，唉！！
號外，號外！！恭喜哂 Louisa，佢個 cake decaration course 1 考試順利過關之餘，阿 sir 仲話佢個作品係全班做得最好 o架！
呢個就係佢考試時整嘅蛋糕喇，係咪唔錯呢！
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
都唔係第一次煲呢個素雜菜湯喇，不過同之前有少少唔同，今次加咗清雞湯，所以比起之前果次會鮮味啲。
材料：
番茄
薯仔
洋蔥
南瓜
椰菜
紅蘿蔔
薑片
茄膏
清雞湯
月桂葉 (Bay Leave)
水
調味料：
鹽
糖
- 薯仔、紅蘿蔔刨皮，用滾刀切件；番茄去蒂，切開 8 份。
- 南瓜去皮、去瓤，之後切件；洋蔥去衣後切件；椰菜洗乾淨切件備用。
- 燒熱油，先爆香薑片、洋蔥同月桂葉，之後加埋茄膏一齊爆香。
- 加入薯仔同紅蘿蔔一齊爆炒，之後加水同清雞湯。
- 最後加埋番茄、南瓜同椰菜一齊煲滾。
- 煲好之後酌量加入鹽糖調味。
今次湯煲得好濃呀！
Notes：
- 清雞湯與水最好各佔一半，太多雞湯會過鹹。
- 茄膏一定要爆過先會有濃郁番茄香味。
- 如果鍾意的話可在爆香材料時加入適量紅酒。
- 可將部份南瓜及番茄留起，到煲好前 10 分鐘先放落去煲，因為之前一早落煲嘅
南瓜同番茄，大部份已經煲溶哂。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
好耐都無整雞翼喇，今晚煎好雞翼之後，再煮番個我好鍾意嘅檸檬蜜糖芥末汁將雞翼稍煮，雞翼包住甜甜酸酸嘅汁一齊食，唔單只好味，仲可以減少雞翼嘅油膩感覺，正呀！
材料：
雞中翼
醃料：
鹽
糖
雞粉
生抽
紹酒
醬汁料：
蜜糖
檸檬汁
鮮醬油
芥末籽醬
- 雞翼洗乾淨、瀝水，用抹手紙索乾水份。
- 用醃料將雞翼醃 1 個鐘或以上。
- 燒熱油，放雞翼落鑊煎至兩面金黃色，盛起待用。
- 將醬汁材料放鑊內煮滾後，加入雞翼，不停兜炒至收乾汁，上碟。
雞翼煎得金黃，醬汁味道醒胃！
Notes：
- 醃雞翼時，最好中段時間將雞翼翻轉，方便均勻醃入味。
- 煎雞翼時唔駛落太多油，因為雞皮本身有大量脂肪，煎到中途會有好多油滲出。
- 如檸檬汁份量太少，加加入適量水份煮醬汁。
農曆年時，我買開嘢同 Louisa 拜年時，順便買多份送俾佢家姐，點知家姐又咁鬼客氣，封番利是俾我之餘，仲買咗包黃耳送俾我呢！
我不嬲都有食開黃耳，不過因為價錢唔平，所以唔會成日食。我多數會用嚟煲湯同炆餸，口感好食過雪耳、雲耳同木耳好多，家姐話仲可以要嚟煲湯水 o添呀！
我好鍾意家姐送俾我呢份新年禮物，實際兼有益健康。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
咪見到個標題就以為我叻到自己整蜂蜜呀！！其實係我老豆個農場 friend 自己親自養蜂，親手打 o架，勁！
老豆話，呢樽啤酒樽咁大嘅蜂蜜，佢個 friend 賣俾街市人時係每樽 $200 o架！不過仍然有好多人會買，因為知道係自家製造，無任何添加劑，夠哂純正。等到我依家食開果樽蜜糖食哂時就會開呢樽嚟食喇。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
農曆新年時，老豆喺農場度捧咗盆四季桔返嚟，咁過咗年之後就當然會將啲桔全部剪哂落嚟食啦，但係咁多，根本食唔哂，而屋企本身又已經醃咗好多樽鹹金桔喺度，無理由仲繼續醃 o架！正當要幫佢哋搵出路時，突然間諗起可以加埋橙一齊整果醬喎，咁就順理成章咁整咗呢個 marmalade 喇！
材料：
橙 1 個 (約 300 克)
四季桔 重量與橙相約
黃糖 180 克
檸檬 1/2 個
食譜參考自天拿‧公嘅橙皮果醬。
- 先洗乾淨橙同桔，用叉喺橙皮上 "拮" 窿，之後將橙放入滾水內煲 15 分鐘，之後
加入桔再煲多 15 分鐘。
- 將橙同桔撈起，放入凍水內降溫。
- 將橙嘅皮搣出，繼續浸於凍水內，果肉則切去白膜後切粒，並將白模內嘅果汁盡量
榨出；柑桔就一開四，刮出果肉同內瓤、去核，榨出果汁。
- 橙皮切去白色內瓤，之後連同桔皮一齊切絲；檸檬刨皮，榨汁。
左邊果塊已經切去白瓤，右邊果塊就仲未切瓤。
- 將所有果肉、果汁同果皮一齊放入煲內，用慢火加熱。
- 其間要不停攪拌，並分 3 次加入糖。
- 當果醬煮到開始變得濃稠且有光澤時，測試一下凝固點。
- 將少量果醬滴落已雪凍嘅碟上，用手指劃過果醬，如果留有一條劃痕，即代表果醬
已經煮到凝固點，果醬已經煮好。
- 煮好嘅果醬勺入玻璃樽內儲存。
為食嘅我，影完相之後就即刻將剩番呢少少果醬搽梳打餅試食，
味道好好呀，啱哂我呢個 "橙精"！
Notes：
- 如果無四季桔的話，可用多一個橙代替，即共用兩個橙。
- 橙皮嘅白色內膜要盡量切走，如果唔係就會有苦澀味。
- 四季桔毋須切去白膜，因為桔皮上嘅白膜係非常之薄。
- 製作過程中記得留起所有果汁，特別係桔汁，因為市售果膠都係由柑橘提鍊而成。
- 玻璃樽需要事先消毒，以防果醬發霉。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
星期二晚 Miss Cheng 打電話俾我，想問我攞個舊同事個電話號碼，可惜我根本無同佢聯絡，俾唔到 Miss，跟住我就順便問佢幾時得閒出嚟，約埋 Winnie 一齊食飯，點知佢話約我星期四喎，但係 Winnie 都仲未好番，所以今次就得我一個單刀赴會。
上次同 Miss 講好咗，以後每次見面都會整一樣嘢食俾佢，但係呢次約得咁即興，又得咁少時間俾我整嘢，一定要整個簡易快手嘅。突然間諗起上星期喺 Louisa 屋企食過佢細妹喺法國帶番嚟嘅 macaron，係用果醬餡代替 butter cream，食落都幾好味，加上之前 Louisa 叫我喺佢屋企自己試整 macaron 時，因天氣太潮濕而做唔到，所以我就想再整多一次，睇吓掂唔掂，如果 OK 就順便送埋俾 Miss 啦！點知真係撞手神，俾我整到裙邊喎，嘩，真係開心死我呀！！！
你哋睇，雖然外型樣衰咗啲，但真係做到有裙邊 o架！
材料：
蛋白 1隻
糖 16 克
他他粉 1/8 茶匙
糖霜 77 克
杏仁粉 50 克
榛子粉 少許
柚子芒果醬 適量
以上材料份量可做 10 件杏仁餅。
食譜由 Ah Sa 提供。
- 先將蛋白、糖同他他粉用打蛋器略為拌勻，之後放入雪櫃內雪 30 分鐘以上。
- 杏仁粉同糖霜過篩 2 次；榛子粉放入焗爐，用 160 °C 焗 3 分鐘至香，備用。
- 蛋白混合物喺雪櫃度拎番出嚟，之後用電動打蛋器打至八成企身。
- 將杏仁粉同糖霜一齊篩入蛋白霜內，用膠刮混合拌勻，直至混合物表面有光澤。
- 唧袋內放入一個直徑 1 cm 嘅唧咀，然後放入杏仁蛋白霜。
- 喺鋪上入爐防黏紙嘅焗盤上唧出約 3 cm 直徑嘅杏仁蛋白霜，灑上焗香榛子粉後，
放室溫 30 分鐘，等到蛋白霜表面風乾。
- 風乾後，將杏仁蛋白霜放入已預熱至 140 °C 嘅焗爐內先焗 10 分鐘，之後立即調低
至 100 °C 繼續焗多 5 - 10 分鐘。
- 杏仁餅出爐攤凍後，搽上適量果醬，再合上另一塊杏仁餅即成。
本來都諗住唔 post 啲相上嚟俾大家睇 o架喇，因為真係唧得勁樣衰囉！
不過唔緊要啦，就當係提供笑料俾大家啦！
焗第一盤時，係跟 Louisa 俾我果個食譜嘅爐溫同入爐時間嚟焗，
但係就全軍覆沒，全部燶哂！因為我個焗爐個爐火係
比較熱，不過都有裙邊呀！
第二盤唧得好少少，始終都係因為蛋白打得唔夠挺，太瀉身喇，
所以好難控制，呢頭唧落去，果頭就已經開始瀉喇！
而呢盤就跟 Rachel 本《為您做甜品》個爐火同時間嚟焗，即刻掂哂！
好彩最終出嚟效果都唔太差啫！Louisa 呢個食譜真係好得，好多 blog 友都要整好多次先至成功整到，但我整一次都算叫做 OK 呀，如果你哋有 click Ah Sa 條 link 嚟睇，你哋就會見到佢已經整過幾次，次次都好成功，仲整得好靚 o添！
兩件 macaron 加一細樽柚子芒果醬，就係今次送俾 Miss 嘅伴手禮。
Notes：
- 可用任何自己鍾意嘅果醬嚟整，不過小弟強烈建議最好用味道較酸嘅果醬，可以平
衡一下杏仁餅嘅甜度。
- 雖然糖嘅用量比較多，做出嚟嘅成品味道亦比較甜，但絕對唔可以隨便減少用糖
份量，因為糖份多寡會直接影響馬卡龍焗出裙邊。
- 於室溫風乾時，一定要乾到完全唔黏手先至可以入爐焗。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
