豆豉鯪魚炒油麥菜

        相信唔少人都會食過豆豉鯪魚炒油麥菜，喺酒樓食飯都應該有得叫。

        我第一次食呢個餸，係好細個果陣啦，應該係讀中學時啩，咁耐真係唔記得啦！果陣時係媽咪煮嘅。平時間唔中都會食吓炒油麥菜，雖然少食罐頭，但豆豉鯪魚都有食嘅，不過將兩樣嘢擺埋一齊炒，當時真係覺得好怪，唔係好接受到。點知到食果陣又覺得幾 OK 喎，仲幾好食 o添！

        今晚想重溫一次呢個味道，而且見材料同煮法都唔係太覆雜，所以試吓自己煮，不過就未必會煮到媽咪咁好食囉！

材料：
油麥菜
豆豉鯪魚
蒜茸
薑片

調味料：
雞粉
紹酒
糖

- 油麥菜洗乾淨後摘到適當長度；將鯪魚肉切碎，備用。

- 將豆豉鯪魚連適量油放落鑊爆香，灒酒，兜炒一陣就盛起魚肉同豆豉，油留鑊
  內。

- 加入薑片、蒜茸爆香，放入菜炒幾下，加少量水，冚鑊蓋煮至微微軟身。

- 將豆豉鯪魚回鑊，落調味，炒勻即可上碟。

Notes：
- 雞粉唔駛落太多，因為豆豉鯪魚本身都已經有味，否則過鹹。

- 油麥菜唔好煮得太腍，保持爽脆先好食。