柚子芒果醬 Pomelo Mango Jam

        早前 Louisa 整咗啲果醬送俾朋友，包括士多啤梨果醬同柚子芒果醬，不過我兩隻果醬都無試呀，因為當期時我自己都啱啱整咗士多啤梨果醬，而 Louisa 就話俾我聽隻柚子芒果醬好評如潮，連 Winnie 食過都讚好，所以我就叫佢教我整喇。

       其實都唔難整，反而要買到柚子皮同柚子汁比較難，好彩 Louisa 早前 "割愛" 將佢用剩咗嘅少量柚子皮同柚子汁俾咗我，咁我就有機會學整喇！咁啱上星期「惠康」啲芒果又勁減，3 個都只係賣 $5 咋，雖然完全未熟兼仲好青，不過我都照買，因為真係好平，擺到一個禮拜後嘅今日，已經完全熟透，可以開工啦！

材料：
芒果肉      1 杯
糖             1/2 杯
柚子汁      2 湯匙
柚子皮      適量

- 將芒果肉切細；柚子皮切幼絲。

- 將芒果肉同柚子皮放入煲內，加入柚子汁拌勻。

- 用中火將材料煮熱，芒果開始變軟身後就加埋糖一齊煮溶。

- 當煮到起泡時就轉中細火繼續煮。

- 果醬煮到濃稠且有光澤時，則代表果醬已經煮好。

- 熄火後就可以將果醬入樽。

 

 

 

 

都諗唔到煮起有咁多，就送一樽俾老豆個農場 friend試吓先！

 

 

 

Notes：
- 用嚟裝果醬嘅樽事前必須消毒，請參考《玻璃樽消毒方法》。

 

- 要確定果醬煮好與否，請參考《草莓果醬》做法。

- 因自家製果醬並無添加防腐劑，所以做好嘅果醬一定要放雪櫃內保存。