2013年9月25日星期三

鹹湯丸

        好耐好耐之前,喺 Yahoo Blog 度睇到 blog  Motonako A. 整鹹湯丸已經好想整,但係拖吓拖吓,拖到家吓先整,真係死得!!

        整鹹湯丸絕對唔難,最重要都仲係個湯底,湯底夠鮮甜就自然好食,因為湯丸本身只係一嚿粉,乜味都無嘛!所以呢個鹹湯丸真係點整都得,總之自己想要咩湯底就整咩囉!
 
        淨係同大家分享湯丸整法算喇,至於湯底做法,發揮你哋嘅小宇宙啦!
 
 
 
材料:
糯米粉    200
           160 毫升


- 先將 50 糯米粉放碗內,然後將 40 毫升水煲滾並撞入粉內,用膠刮拌勻成熟粉糰。

- 將其餘嘅糯米粉及水加入,拌勻成糰。

- 將粉糰搓長,切成若干細份,然後搓圓。

- 煲滾水,將粉糰逐粒放入,用中慢火煮至粉糰浮起即可。
 
- 盛起湯丸放入碗內,勺入湯及料即可享用。
 
 
 
記得 Motonako A. 當時落重本去整,又用瑤柱、又落
金華火腿,我自己一條友食就唔攪咁多喇,
加幾條蝦乾落去淆湯,一樣鮮味。
 
 
 
 
 
 
真係唔錯,好鍾意食湯丸煙煙韌韌嘅口感,懶起上嚟,
就咁用現成盒裝高湯做湯底,加幾條菜
就攪掂一餐喇!
 
 
 
 
 
 
有菜又有肉,夠營養之餘又夠飽肚,
係湯粉麵以外另一不錯選擇。
 
 
 
 
 
 
Notes
-
拌粉糰時,水最好逐少加入,若果太濕的話,可以加入適量糯米粉,拌至不黏碗
  即可。
- 搓起嘅湯丸如果唔係即刻煮的話,就要用濕布冚住或放入盒內,避免表面風乾。
 
- 湯丸可以一次過整定多少少放入冰格保存,到煮時唔使解凍,直接放入滾水內煮熟
  即可。

 
 
 

33 則留言:

  1. 你一日出咁多post?我地都係吃鹹湯丸架。最緊要有海味做湯底。

    回覆刪除
    回覆
    1. 唔好意思呀,係咪煩到妳呀!因為我唔係日日得閒坐低慢慢寫 blog,所以一有時間就一次過清貨囉!

      係呀,係咪江浙人傳統呀?

      嘩,一定要有海味咁高檔?

      刪除
    2. 我唔煩, 只怕自己 miss 左, 以為得一篇, 原來有三篇,又以為 blog 友搬緊 blog. 唔係用海味是高級, 用得幾多吖, 只是用來吊呆, 也是傳統做法。 以前鄉下人點會有高級海味食呢。

      刪除
    3. 用海味做湯底就一定鮮味,加分呀!!

      刪除
  2. 鹹湯丸好特別呀, 我都鍾意湯圓煙煙韌韌既口感, 我以前食過一隻湯圓叫元宵, 裡面包肉嫁.

    回覆刪除
    回覆
    1. 我同妳一樣都係鍾意佢個口感!

      真係有肉做餡?呢個未試過喎!

      刪除
    2. 係呀, 真係有肉係裡面. 我都係係鄉下個時食過...初初覺得有d怪, 但係食食下就會鍾意食

      刪除
    3. 點會怪呀,咪好似餃子咋嘛!我都好想試呀!

      刪除
  3. 我婆婆每年團年飯都會整哩個,我好中意食呢~~

    回覆刪除
    回覆
    1. 團年飯唔係食甜湯丸咩?開開心心、甜甜蜜蜜嘛! ^^

      刪除
  4. 買D鮮肉做餡,將D餡包入湯丸裡面都好好吃架^^

    回覆刪除
    回覆
    1. 但係個皮咁軟熟,會唔會好難包餡呢?

      刪除
    2. 唔會難包,仲好好玩的,我試過整^^

      刪除
    3. 嘩,妳果然凡係 "包" 都難唔到妳喎,勁!

      刪除
  5. 未食過咸湯丸, 我真係大鄉里~~~~

    回覆刪除
  6. 我都係嫁咗俾個台山人先至見識鹹湯丸,不過我都唔鍾意食。

    回覆刪除
    回覆
    1. 我老豆係台山人,都係整鹹湯圓,但我唔鍾意食!

      刪除
    2. 原來係廣東食品嚟㗎!?我仲以為係外省嘅㖭!!

      咁妳倆梗係唔鍾意食年糕㗎喇!

      刪除
    3. 我鍾意食年糕,上海嘅,韓國嘅都鍾意。

      刪除
    4. 嗯,鍾意食年糕但又唔鍾意食湯丸!?嫌佢太腍?

      刪除
  7. 未食過咸湯丸,搵日試下整先

    回覆刪除
  8. 咸湯丸我都係來咗呢度先知,因為好多台山人,佢哋過冬係食咸湯丸!!我都鍾意食,個湯底喜歡乜就放乜^^

    回覆刪除
    回覆
    1. 哈哈,果然金山阿伯大部份都係台山人!!

      我係 1/8 個台山人都唔知呢!都係樓上兩位姐姐講我先知咋!

      刪除
  9. 全家都不愛所以無整過,你可以不用請我食啦

    回覆刪除
    回覆
    1. 妳有病咩!?有湯有菜點請妳食呀?拎出拎入都唔方便啦!

      原來妳全家人都唔食湯丸!

      刪除
  10. 咸湯丸我家鄉都有喎,幼年時返家鄉探親,當時她們很窮困,冇米煮飯,就用緊有的菜蔬,芋頭,蕃薯等等煮一大鍋湯,加上一點粉糰,就當一餐了,有時唔夠粉,就開稀佢,由鍋邊倒入,等D粉漿烘成形便把它推入D湯內,形成一片片捲狀的粉捲,名為 (鍋邊)粉,現今物質富裕,她們用上了各類海產,上湯,變成了一款美食了。

    回覆刪除
    回覆
    1. 以前同依家嘅生活真係差好遠!

      不過可能我會比較鍾意食妳以前嗰種,因為我唔係食肉獸,素食都唔拘,更重要嘅係我係好鍾意食澱粉質重嘅食物呀!!

      刪除
    2. 瀨鍋邊我食過呀 , 好味 , 不過好耐無吃了 ,
      鹹湯丸我又中意食 , 我媽咪年年冬天都會整黎大家一齊食架!

      刪除
    3. 團團圓圓呀!

      食得甜湯丸多,食吓鹹嘅都唔錯!

      刪除
  11. 台山湯丸最重要是湯底和配料,是整碗湯丸的靈魂!不喜歡吃的肯定沒有放自己喜愛的材料。湯底可以雞湯,可以豬骨湯。我小時候好喜歡吃,冬至那天不可缺少的。

    回覆刪除