2013年9月28日星期六

西檸煎素雞

           攪錯呀,又多一個學生停學!?!?攪乜呀!!!!!

        噚日晏晝收到中心同事電話,話俾我聽我學生喺學校跌嚫,整傷咗隻手彈唔到琴,要停學一段時間;之後 Miss 個學生跟我學 aural10 月頭就考試喇,咁即係話跟住又無多份收入囉!!唉,睇嚟我真係要去鵝頸橋一轉先掂喇,打完小人之後跟手喺天橋底瞓埋,一舉兩得,唔使另外行多轉!!!不過最驚都係連打小人嘅錢都俾唔起咋!哇咔 ~ ~ ~ ~
 
        喺我屋企,檸檬呢一樣嘢真係好難去清貨,分分鐘可以喺個雪櫃度擺足幾個月!咁喺「樹記」買咗素雞,就用佢嚟整個素菜版嘅西檸煎軟雞啦!


同用真雞肉整唔同,因為雞肉有鮮味,所以煎香雞扒後
將個汁淋上面就攪掂,但素雞無味,所以我會
將佢放落汁度煮一陣,入味後先
再用吉士粉埋芡淋上去。
 






 
素雞本身充滿豆香味,加上味道酸酸甜甜,
絕對唔會比煎雞扒遜色呀!





        大家可以睇番我之前《西檸煎軟雞》個食譜跟住整哦!

13 則留言:

  1. 好掂噃,一個小男孩可以咁有創意,煮一味咁清新嘅素菜,叻!我都要學吓先( ̄▽ ̄)~*

    回覆刪除
    回覆
    1. 因為我本身唔多鍾意食肉,更加唔鍾意處理生肉,所以我主要都係食素,間唔中先會煮肉食。

      喂,我唔係個小男孩喇,係個 "中坑",哇咔咔咔咔咔咔咔……………!!!!

      刪除
    2. 哈哈!好一位 "中坑" ╮(╯▽╰)╭

      刪除
  2. 我覺得似一條條黃色果d玉子豆腐呀, hehe~~~ 你呢個酸酸甜甜應該好正!

    回覆刪除
    回覆
    1. 望落有少少似,但係好食過玉子豆腐好多囉!可能我唔太鍾意玉子豆腐啦!

      個汁嘅味道同西檸煎軟雞完全無分別。

      刪除
  3. 哈~圓碌碌幾得意! 雖然我就不好素肉呀, 但呢個幾新鮮~

    回覆刪除
    回覆
    1. 素肉唔同素雞㗎!!素肉係用黃豆纖維做成;而素雞就係用腐皮、腐竹類物體做成,所以質地完全唔同。妳有冇食過齋鹵味?有食過的話,其中一款淡黃色、圓形一片片嘅咪係素雞囉,好食過素肉千萬倍呀!!

      雖然我都係主要食素,但我都好抗拒素肉,因為真係實在太難食喇!

      刪除
  4. 呢個餸好特別~~
    其實檸檬都可以有好多用途,放o係雪櫃除下臭,微波爐叮幾秒又可以幫個爐除臭~~

    回覆刪除
    回覆
    1. 係嘅,不過我唔想將個檸檬咁用囉,覺得好浪費,通常用剩頭尾部份我先會咁用。

      刪除
  5. 用檸檬好過用甜酸料, 我鍾意呀。 可能開左學, 學生要取捨,暫時唔學著。

    回覆刪除
    回覆
    1. 係呀,夠天然健康呀!

      唔係嘅,真係有咁啱得咁橋,好幾個都係大人呀!呢次呢個就唔小心跌嚫整到手囉!

      刪除