紅莓蜜糖英式烤餅 Cranberry Honey Scone

        唔知點解，好多人都會叫 scone 做英式鬆餅，咁「麥記」用嚟整豬柳漢堡嗰隻 English muffin 又叫做咩呢！ 

 

今次係參考咗一個用楓糖漿整 scone 嘅食譜嚟整，但我無用到楓糖漿，改用老竇個農場 friend 自家製作嘅蜂蜜，一樣有香濃蜂蜜味呀！

 

 

 

 

烤餅麵糰

 

材料：
低筋麵粉       110 克
泡打粉           5 克
糖                  10 克
鹽                  少許
牛油              35 克
蜜糖              15 克
淡忌廉           60 克
酒漬紅莓乾    適量

 

掃面糖水

 

材料：
蜜糖               適量
水                   少許

 

- 將麵粉、泡打粉、糖同鹽混合好，加入凍牛油，用手指將牛油捽入粉料內成麵包糠狀。

 

- 蜜糖與淡忌廉拌勻，倒入粉油混合物內，邊倒邊用刀切拌成糰。

 

- 加入紅莓乾，用手輕力堆成濕軟麵糰，切勿過度用力搓。

 

- 麵糰壓扁至 1.5 厘米厚，略略整形，用保鮮紙包好，放入雪櫃雪一個鐘。

 

- 將鬆弛後嘅麵糰切件，放上已鋪牛油紙 / 入爐防黏蓆嘅烤盤上。

 

- 放入已預熱至 220 ℃ 嘅焗爐內，焗約 15 分鐘至熟。

 

- 蜜糖同水拌勻，掃上烤餅表面，放番入爐，用爐內餘溫焗多 5 分鐘即可。

 

以上材料份量可做烤餅 4 件。

 

 

 

 

生麵糰已經有好香濃嘅蜜糖味哦！

 

 

 

 

 

 

 

顏色金黃，口感鬆脆，味道香甜，你有興趣一試嗎？

 

 

 

 

Notes：
- 酒漬紅莓乾做法：將紅莓乾放入樽內，倒入冧酒或白蘭地至完全蓋過紅莓乾，浸醃時間越
  長，酒香味越濃，亦可用其他乾果製作。

 

- 糖嘅用量可因應蜜糖甜度而增減。

- 如果麵糰太濕軟、太黏手的話，用手堆麵糰時可加少許手粉防黏。

 

- 若蜜糖唔係太稠身的話，可以唔使溝水直接掃上麵糰表面。