2014年6月3日星期二

放肆的一天

        日紅假唔使教琴,難得一日唔使做嘢兼決定唔煮飯,一於瞓餐飽,瞓到夠為止!

       無落街買餸都唔緊要,因為屋企有好多嘢食等我慢慢去 發掘 瞓到成點鐘先起身,第一餐可以唔使食喇,至於第二餐,不嬲都好簡單、好求其,有老表嘅自家製麵包、車厘茄同蒸番薯,加埋杯鴛鴦就攪掂一餐晏喇!至於第三餐哩 ………
 

 
 
一樣容易攪得掂:有之前整落嘅拍黃瓜kimchi 食完之後
就必定會再補給,基本上係家中雪櫃常備嘅食材;
飲剩最後一碗齋湯;煮啲蕎麥麵做冷麵,
咁咪得囉!仲有飯後甜品水羊羹呀!



        唔使煮飯真係慳番好多時間,成個人輕鬆好多,好多時雖然唔使返工,但因為要煮餐飯,不單只要落街買餸,之後仲要洗洗切切做準備,煮完之後又要做大量清洗工作,其實仲辛苦過返工呀,我呢份工最多咪坐喺度 “enjoy 音樂 鬧學生,哇咔咔咔咔 ~ ~ ~ ~  ^^,咁你話煮餐飯係咪仲辛苦過返工喇!!

       可以名正言順咁輕輕鬆鬆喺屋企做宅男,hea 足成日都唔使叫外賣、食 垃圾,我都真係要讚吓自己至得呀!!所以媽咪臨走前都話過唔使擔心我一個人唔識照顧自己呢!
 
 
 

8 則留言:

  1. 我有時都好宅架,成日都著住套睡衣唔出街。

    回覆刪除
    回覆
    1. 其實返工人好多時放假都唔願出街!

      刪除
  2. 您一個人食都會整咁多樣,我如果一個人,好多時係一煲攪掂,有時懶到碗都唔用,就咁食,哈哈!

    回覆刪除
    回覆
    1. 無呀,除咗冷麵即時整,全部都係隔夜或之前整落㗎,係多洗碗碟啫!

      刪除
  3. 瞓到一點...好耐冇試過喇 巧羡慕呀
    拍青瓜+kimchi+蕎麥麵 好清涼好啱咁大熱天時食

    回覆刪除
    回覆
    1. 但係我好夜瞓㗎!

      係呀,就係貪佢夠清爽!

      刪除
  4. 而家放假都好宅,出街就係去街市,超市入貨。

    回覆刪除
    回覆
    1. 唔係講笑,尤其依家咁熱,真係盡可能都唔想出街呀!

      刪除