2014年6月2日星期一

夏天的西南風

        成日都話,如果再買樓或搬屋的話,一定、一定、一定、一 ~~~~ ~~~~ 唔會再住西斜樓,住足三十年,真係住到驚,嗰種熱法真係唔係人咁品,加上我家係勁開揚,完全無遮無擋,真係曬到爆,夜晚十一、二點摸落幅牆度都仲係暖㗎!所以新屋嗰邊見係東南先敢買,但原來朝早十二點前都係好甘,就算未瞓醒都一定會熱醒,加上又係無遮無擋咁望住個海,不單只無景好睇,仲將陽光反射番哂入屋,一樣咁熱,所以望海樓都係唔好再買
 
        話雖如此,香港嘅夏季多數都係吹西南風,所以屋企無遮無擋都有一定好處,勁通風涼爽,晾衫唔使兩個鐘就已經乾哂收得!唔好話唔使開冷氣,就連風扇我都好少開,呢幾日咁熱夜晚瞓覺我都唔使開風扇,有時天濛光時份仲會涼到要冚被,所以真係慳番唔少電費㗎!翻查紀錄,我已經好耐無交過電費喇,對上一次交電費已經係 2012 9 月份嘅事喇,近呢一年「中電」仲話我達到某個慳電指標,又再額外扣多某個 percentage 電費以作鼓勵㖭!你哋咪以為我真係為咗錢慳成咁呀,只係因為有政府補貼 $300 先會咁,其實每兩個月都要交二百零蚊電費,但都仲係用唔哂全部補貼,之後又再帶落下一期,咁咪所以攪到咁耐都唔使交電費囉!不過呢枝歌都就快無得唱 lu,因為財爺已經宣布咗唔會再有電費補貼,撞啱呢排收入又大減,死未!!
 
 
我間房幅窗簾成日被對流風扯出窗外,如果唔係有個
窗花擋住的話,肯定好似旗幟咁喺窗外飄揚!

 




因為呢排太陽伯伯開始多咗出嚟活動,所以即刻趁機曬吓張毯。呢幾日
真係好大風,連張咁重毯都吹起咗,所以夏天好多時就算
西斜曬入屋都唔可以拉窗簾遮陽光,因為塊窗簾布
輕到被風吹起打上天花燈,好危險哦!除非係
閂埋窗啦,但係西斜入屋又閂埋
的話,我估我會上頭條囉!
 
 
 
 

 
       2010 6 月份時,我都寫過一篇《屋企好大風呀!!》,當時風勢比依家仲勁,你哋睇番相就知喇!

 
 

14 則留言:

  1. 哈哈!我都係住咗三十年西南屋喎,我個房仲两面夾供,一面窗向東南,一面窗向西南,C未,您就好啦,可以買過間新屋,我就要喺度終老喇,不過,西南日間真係好好風,但有冇發覺黃昏後,就好似熄掣咁,突然冇哂風咖,您想唔開冷氣都唔得了,雖則係咁,有一樣好處,係夠光猛和乾爽。

    回覆刪除
    回覆
    1. 嘩,妳仲慘,簡直係個煉獄!!

      唔係呀,新屋俾咗我細佬住,我照舊住番喺舊屋咋,所以先至可以曬毯。

      有好多時都係咁,一收太陽就即刻 "熄咗個掣",我估係因為無太陽時天氣即刻降溫,無咗冷熱空氣對流,所以就風都無埋。但呢幾晚我屋企出奇地依然好猛風喎,夜晚瞓覺可以唔使開風扇都得呀!

      刪除
  2. Kestrel,您好啊!好耐無同您打招呼啦,請問您還記得上年係您舊Blog度向您請教整月餅,那位King嗎?其實我之前覆您幾次,都無法留言,有d還去到我email度,之後我個Email,入唔到,又忘了安全問答,到呢家都入唔到去,所以我更加搵唔到您這位網友,這Gmail,都係上個月才申請左無幾耐咋,我亂打亂撞來到
    http://yikc9.blogspot.com.au/2014/05/blog-post_2520.html?m=1
    就見到您,所以特意前來跟您打聲招呼。^_^同您講聲端午節快樂,今日吃左粽未呀?^_^

    CM

    回覆刪除
    回覆
    1. 哈哈,其實係人都知我老人癡呆嚴重,連所有 blog 友都知,所以我真係印象好模糊呢,嘻嘻!^^ 不過唔緊要啦,大家有緣再次相遇,都係一種緣份,要好好珍惜!咁妳訂閱咗我個 blog 咪以後都唔怕再失去聯絡囉!

      係呀,妳搵到 T&P 就搵到我㗎喇,我係 P 姐個忠實粉絲呀!嗯,咁妳會唔會重新喺呢度寫 blog 呀?

      首先好多謝妳咁有心呀!不過妳睇番我前一篇《多謝老表的心意》,妳就知道我逢端午節都唔快樂,唔會食粽,只會食齋,除非妳請我食齋粽啦,哈哈!

      大家保持分享交流呀!

      刪除
    2. Oh!!!!!!……Kestrel,非常之抱歉!!!!!!
      我已睇了 《多謝老表的心意》,真是非常之抱歉 。請見諒我無心之言。

      今年我都無包粽,下年,如有包粽,會包埋素粽請您吃。嘻嘻…

      刪除
    3. 咁又唔使咁唔好意思,正所謂不知者不罪嘛!況且都已經隔咗咁多年,都已經唔再傷心喇!之前有個朋友同我講,佢話我之所以咁傷心,就證明我跟媽咪關係非常之好,如果唔係的話,又點會傷心成咁呢!好多謝我呢位朋友,我聽了之後都立刻釋放咗唔少心理負擔呀!

      係咪呀,咁我就等妳出年隻齋粽喇,哈哈!其實我一直都好想試試裹粽,但好怕包得唔好,一落水烚就即刻漏番哂啲米出嚟,嘥功夫兼嘥心機呀!

      刪除
    4. Kestrel,午安!

      其實我包棕都係初哥來咋,一隻都包好耐下,哈哈。。。

      嗯,正如您所講,您和您媽咪關係非常之好,相信她在天之靈,都係希望您開心快樂的生活,絕不想見您傷心難過的。相信只要您開心您媽咪一定開心。。。。。。

      明白您感受,身為局外人講就容易。如有講錯說話鈎起您有任何不快之心情,敬希見諒。

      祝您有一個愉快的週末!

      刪除
    5. 我都已經無考慮到唔熟手包得慢呢個問題,如果包好耐時間兼又包到有穿漏,咁就真係死得喇!

      唔緊要,都過咗咁耐喇,心情已平伏了,只不過係仍然有掛念之心!謝謝妳呀!

      刪除
  3. 唔洗交電費加加埋埋慳唔少喎!又可以晾衫,好環保呀!

    回覆刪除
    回覆
    1. 係呀,慳埋慳埋咪可以買好少少嘅食材囉!

      刪除
  4. 我香港家是向西北,吹正西北風,冬天凍到C呀。

    回覆刪除
    回覆
    1. 係呀,我有啲學生屋企向正北,凍到發瘟!以前有個學生住樂富,客廳個窗對到正獅子山,全屋窗閂哂都不停聽到門隙窗隙 "呼呼聲" 風,真係好甘!

      刪除
  5. 我屋企都係向西北,夏天熱到死,冬天就凍到死!

    回覆刪除
    回覆
    1. 嘩,咁 cici 妳咪好慘!又係一個人間煉獄!!

      刪除