咖啡朱古力雪芳蛋糕 Coffee & Chocolate Chiffon

        今日因為係紅假，所以唔駛去老人中心教合唱團，而 Ryan 又要去參加婚禮而上唔到堂，所以今日就變咗 dayoff 喇！咁喺屋企有咩好做呢？梗係開爐整嘢食啦！哈，學 Louisa 話齋，真係有病 o架，難得有假期又唔休息，硬係要搵嘢嚟整，好似唔整就周身唔聚財咁！！

        今次我揀咗整咖啡朱古力雪芳蛋糕，因為諗都諗到好味道啦！

咖啡朱古力雪芳蛋糕

材料：
蛋白                  110 克
糖                      65 克
粟粉                  5 克
蛋黃                  40 克
淡忌廉              15 克
水                      35 克
植物油              36 克
苦甜朱古力      30 克
低筋麵粉          55 克
肉桂粉              3 克
可可粉              2 克
細磨咖啡粉      3 克

- 先將麵粉過篩 3 次；朱古力隔熱水座溶。

- 用電動打蛋器以低速將蛋白打至起泡，之後分次加入 55 克糖，用高速打至企身
  後，再加入粟粉繼續打至乾性發泡，做成蛋白霜。

- 蛋黃、淡忌廉、水、油同朱古力用打蛋器低速拌勻。

- 篩入麵粉，以低速拌勻成麵糊，之後再加入肉桂粉、可可粉、即磨咖啡粉及剩低
  嘅10 克糖，同樣用低速拌勻。

- 蛋白霜用膠刮分次拌入麵糊內，以切拌方式拌勻所有材料。

- 將已拌勻嘅麵糊倒入雪芳模內，然後放入已預熱 160 °C 嘅焗爐內焗約 30 分鐘。

- 出爐後就立即將蛋糕倒扣放涼，攤凍後脫模。

 

一路焗緊嘅時候，已經不斷聞到好香嘅朱古力味、咖啡味同肉桂
味，好心急等住食呀！

 

原來右邊果個模有少少滲漏呀！

 

蛋糕裝飾

材料：
甜忌廉              140 克
即溶咖啡粉      2 茶匙
防潮可可粉      適量

- 先將甜忌廉隔冰水用電動打蛋器打發至企身。

- 用小量水將即溶咖啡粉溶解後，加入已打發忌廉內拌勻，做成咖啡忌廉。

以上材料份量可做 17cm 雪芳蛋糕一個。

食譜係參考咗 Ozawo Noriko 嘅《戚楓蛋糕秘法傳授》。

 

組合蛋糕

- 用抆刀將咖啡忌廉抆上蛋糕表面及內圈。

- 再喺蛋糕面灑上防潮朱古力粉即成。

        真係好似 blog 友 A moon 咁講，啲朱古力會令到蛋白霜消泡 o架！當我將啲蛋白霜加落去朱古力麵糊度時，即刻聽到微弱嘅 "吱吱咋咋" 聲 ，係啲蛋白霜消泡嘅聲音嚟 o架，聽到都真係幾驚，好驚會失敗呀！因為消泡嘅關係，所以麵糊體積都減少咗。平時除咗可以做到兩個小型蛋糕外，仲會有少少麵糊剩，但今次就連裝兩個小型雪芳模都唔係好夠呢！

        唔知係咪因為消泡嘅原因，個蛋糕攤凍後回縮得好勁，其中一個仲幾乎成個脫模咁滯！！

右面果個縮到得番好細個咋！

 

之前左邊果個脫咗模之後都 OK 喎，起碼無 "熟悉的凹陷位" 先啦！

 

右邊果個就真係想死呀！！攪到收哂腰，你估你係經典朱古力
蛋糕咩！！真係無眼睇呀！ 

 

靚啲果個抆好 cream 之後都唔錯喎，不過我啲抆 cream 技術
就真係有排練喇！

 

之前喺「二德惠」度買咗 pack 圓形蛋糕盒，要嚟送禮都幾得
體呀，好啦，聽日 Lily 嚟學琴時就送俾佢 啦！ 

 

個 "A 貨" 經典朱古力蛋糕見到都無乜心機整靚佢，求求其其咁
抆完 cream 之後，就灑上朱古力粉，點知灑到一邊多一邊
少，於是將錯就錯，就將佢變咗做一個 "A 貨"
Tiramisu 喇！

 

因為靚果個要送俾 Lily，所以我同老豆就食樣衰果個。

 

        個蛋糕雖然係樣衰啲，但味道真係一流，無得頂！因為我用咗 Valrhona 72% 嘅苦甜朱古力，所以朱古力味勁香濃，仲帶有少少我最鍾意嘅肉桂味 o添！個 cream 就仲正，咖啡味好濃，Lily 實鍾意！呢個雪芳蛋糕一定會不停咁 encore，不過就要試吓用其他食譜去整，唔想再有  "A 貨" 嘛！

Notes：
- 蛋白霜打好之後，可放入雪櫃以保持蛋白霜內氣泡嘅穩定性。

- 根據食譜指示，如果蛋白霜變軟時，可以用打蛋器再次打發。

- 如果屋企有奶的話，可直接用 50 克奶代替水同淡忌廉。

- 細磨咖啡粉可放入攪拌機內打到更加幼細，以免蛋糕食落有粗粒口感。

- 唔用甜忌廉的話，可用淡忌廉加 13 克糖打發，之後再加入咖啡溶液即可。