好耐都無自己整包包喇，上次用剩咗放喺冰格嘅酵母要盡快用埋佢喇，如果唔係過咗期就嘥喇，最驚都仲係搓好哂麵糰後先發覺酵母失效，發唔起，咁就真係嘥心機兼嘥材料喇！
材料：
高筋麵粉 175 克
全麥麵粉 75 克
小麥胚芽 10 克
即用酵母 4 克
水 125 毫升
鹽 2 克
糖 25 克
固體菜油 15 克
以上材料份量可做 450 克長形吐司一條。
- 除水及固體菜油之外，將其餘所有材料放入不銹鋼兜內混合好。
- 加水搓成光滑麵糰，之後包入固體菜油，繼續搓揉及摔打麵糰。
我自己就用 food processor 搓麵粉，慳番啲力。
- 當麵糰拉開時能夠形成薄膜，就可以將麵糰滾圓，封好收口位置。
- 不銹鋼兜內撲上少少粉，放入麵糰，收口向下，冚好保鮮紙作第一次發酵。
- 約 30 - 45 分鐘後，當麵糰發酵到兩倍大時，即代表第一次發酵已經完成。
- 之後用拳頭壓下麵糰 3 - 4 次，將麵糰排氣，並分割成兩個麵糰，滾圓後再次冚
上保鮮紙，鬆弛 10 分鐘。
- 麵糰再次滾圓，之後放入吐司模內，冚上保鮮紙作最後發酵。
- 當麵糰發酵到吐司模嘅九成滿時，就可以放上烤盤，放入已預熱至 200 °C 嘅焗
爐內焗約 30 - 35 分鐘即成。
嘩，做乜無端端發到爆開咗 o架，激死人！
- 出爐後立即脫模，放上架上攤凍。
麵包質地好鬆軟呀！
搽上花生醬同朱古力醬嘅多士，特別好食！
Notes：
- 固體菜油可用牛油或液體油代替。
- 小麥胚芽可隨個人喜好增減。
- 加水時，最好逐少加入，唔好一次過全部倒哂落去，因為唔同牌子嘅麵粉同天氣
濕度都會影響水份用量。
- 麵糰第一次發酵後，可用手指沾上少少粉，然後插入麵糰內，若麵糰無即時收
縮，即代表發酵完成。
- 出爐後要即刻脫模，以防熱空氣遇冷形成水氣，影響麵包質感。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
