又係送上康乃馨嘅日子

        話咁快又到母親節，喺呢度照舊同全球華人媽咪講聲：「母親節快樂！」

        對我嚟講，呢個係一個觸動我思緒嘅日子！依家都無乜嘢可以做到喇，唯一可以做嘅，就係給媽咪送上一束康乃馨，希望佢 feel 到我對佢嘅思念同心意啦！

        早幾個星期，老人中心嘅 Helen 俾咗幾首廣東歌我揀嚟教，正好有首陳百強嘅《念親恩》，我諗都唔駛諗就揀咗呢首歌嚟教，因為自從媽咪離開咗我之後，我對呢首歌好有感覺。當我派歌紙俾同學時，佢哋即刻話：「係喎，就快到母親節喇喎！」老實講，我真係無諗過呢個問題，純粹係出於自己感覺而揀。跟住我就同佢哋講，其實母親節係搵母親笨，雖然啲仔女話請媽咪飲茶，但係好多時其實係父母先到茶樓搵位，之後佢哋先施施然到，其實只係志在俾錢埋單，未必真係有果個心！講完之後，班同學都好認同，仲話我咁了解呢！

        唉，我都想搵定位請媽咪飲茶呢 …………

P.S.  話口未完，打好呢篇 blog 之後，走入廚房整嘢，即刻聽到 Danny 唱緊《念親恩》，我即刻成個人呆咗咁企喺度聽，唔怪得之老人中心有同學話呢幾日成日都聽到收音機播呢首歌啦！