家鄉蒸蛋糕

        今日好開心呀，居然咁好陽光，真係諗都無諗過，同噚日簡直係兩個世界！所以教完老人中心，返到嚟商場買完嘢之後即行飛返屋企，洗咗兩機衫。呢幾日暫時都唔會落雨，仲間中有陽光㖭，所以嚟緊會趁好天洗多 3 機衫，洗清全屋所有污糟衫褲同傢俬布，我真係好怕要洗啲又大又厚嘅傢俬布時遇著落雨，掛喺室內真係都唔知要掛幾耐先乾透，煩死！！

        洗好哂、晾好哂所有嘢之後，抖咗一陣，check 完 e-mail 之後就開始整蛋糕喇！蛋糕係整定嚟星期日帶去探阿爺、阿嫲同表舅父嘅，今個禮拜日再唔去的話，就無車上山喇，到時要搭的士上去，肉痛死喇！

        點解我會叫呢個蛋糕做家鄉蒸蛋糕呢，係因為除咗我同 Lily 呢兩大家族之外，好似咁耐都未見過有其他人會咁樣整，多數蒸蛋糕嘅方法都會好似焗海綿蛋糕咁將雞蛋打至發白，而呢個蒸蛋糕就唔會咁做，而且係唔會落油嘅，一來健康啲，二來整完之後清洗用具都方便好多，好快手攪掂。再者，材料非常簡單，又唔駛用爐焗，啱哂果啲屋企無焗爐，又無電動打蛋器，但又想自己整蛋糕嘅朋友。

        呢個家鄉蒸蛋糕可以話係我踏上整蛋糕之路嘅 "啟蒙老師"，第一個整嘅蛋糕就係佢喇！當時因為未有焗爐，所以多數都係蒸蛋糕，而且喺我個家族裡面，個個親戚唔知點解都好鍾意食，就連全場最細嘅添添都好鍾意食呀！我當年就係因為好恨食先至會叫伯娘教我整咋！

你哋睇吓個蛋糕蒸得幾脹卜卜，連個方形紙模都被個蛋糕
撐到變哂形呀，呵呵！

材料：
雞蛋            4 隻
糖                80 克
中筋麵粉     170 克
吉士粉         30 克
泡打粉         1 茶匙

- 先將所有粉類過篩 3 次；雞蛋用打蛋器拂打至有少少泡即可。

- 加糖入蛋液內，座溫水拂打至糖完全溶解。

- 將粉類逐次篩入，用打蛋器拌勻至見唔到粉粒為至。

- 麵糊倒入模內，用中大火隔水蒸熟即可。

Notes：
- 蛋液加入糖之後，一定要座熱水拂打，否則糖就好難完全溶解，蒸出嚟嘅蛋糕就會
  變成兩層，因為唔溶嘅糖會沉低。我自己就習慣一開始整時已經用最細火煲住鑊水
  ，當加糖後就可以將攪拌兜放上蒸架上拂打，由於之前只係用最細火嘅關係，所以
  唔使驚會過熱而令蛋液凝固。

- 由於雞蛋無打起至發白嘅關係，所以會好稠身，好難同麵粉拌勻，所以要繼續用打
  蛋器做攪拌工作，一手不斷慢慢轉動斜放 45 ° 嘅打蛋器，另一手就不斷咁慢轉攪拌
  兜，咁樣麵粉就好容易同蛋液混合好。

- 無中筋麵粉的話，可以用一半高筋麵粉溝一半低筋麵粉做成中筋麵粉。

- 加吉士粉只係為咗令蛋糕顏色靚啲同味道香啲，所以如果無吉士粉的話，可跟原食
  譜用足  200 克麵粉。

- 用唔同形狀、唔同大細嘅模嚟蒸蛋糕，所需時間都唔同。只要將竹簽插入蛋糕，掹
  番出嚟之後無任何嘢黐住竹簽即代表已經蒸熟。如果你屋企有個大模可以裝起哂全
  部麵糊一次過蒸的話，咁時間就大約係 30 分鐘。