日式咖喱吞拿魚意粉

        好耐都無同大家分享過我嘅懶人餐啦，因為今晚淨係煮俾自己食，所以唔攪咁多喇，求求其其就算，真係好又一餐，唔好又一餐！

        見好耐好耐都無煮過意粉，近排好想食，加上我老豆又唔係好好意粉，咁佢唔喺度食就啱哂喇！今晚我用咗日式咖哩磚加罐頭吞拿魚嚟煮意粉，呢個配搭都係我第一次試整咋！但出嚟個效果又唔錯喎，味道層次好分明，意粉有蒜香味、有咖喱嘅香辣、有番茄嘅酸甜、仲有罐頭吞拿魚獨有嘅鹹香，真係一次意外嘅驚喜！

你哋唔好以為我掟錯咗肉醬意粉幅相上嚟呀！

材料：
意大利粉
雞蛋
洋蔥
番茄
罐頭吞拿魚
蒜片

調味料：
鹽
糖
紹酒
日式咖喱磚

- 番茄去蒂，洋蔥去皮，洗乾淨後切粒；罐頭吞拿魚瀝乾水份。

- 煮滾水，將意粉烚熟，之後盛起、瀝乾水，備用。

- 先將雞蛋煎熟，盛起；落少少油，爆香蒜片，將意粉回鑊炒至乾身，盛起。

- 再落少少油，爆香洋蔥，加埋吞拿魚一齊炒，灒酒，繼續兜炒至香味出。

- 加入番茄，兜兩兜，之後就落埋咖喱磚，加入適量水份，將咖喱煮開。

- 當咖喱完全溶解並煮至適合濃稠度就可以熄火。

- 將咖喱汁舀上意粉上，上面再放上煎蛋即成。

今次煮意粉同以往好唔同，無將意粉烚到完全腍身，之後亦無過冷河，
雖然意粉比較黐，但口感都唔錯，有咬口之餘，又唔會太硬。
好，下次挑戰吓 " al dente"，睇吓自己接唔接受到先！

Notes：
- 烚意粉時，記得要落鹽，如果唔係啲意粉點煮極都硬係無乜味道。

- 如果用罐頭油浸吞拿魚的話，可以直接連適量油落鑊炒兼同時爆香洋蔥。

- 落咖喱磚後，一定要加足夠水份，並不停攪拌，否則好易黐底。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！